Pathiannia vote chhiar an duh lo; Party ṭhenkhatin sawn turin an ngen

MNF leh Congress party-te chuan Mizoram inthlanpuia vote tlate chhiar hun atana Pathianni (December 3, 2023) ruat tawh chu sawn a, Pathianni ni lo ruat turin Election Commission of India (ECI) an ngen. MPYCC leh PC party ten Pathiannia vote chhiar chu an duh loh thu an tarlang bawk.

MPCC president Lalsawta chuan chief election commissioner Rajiv Kumar hnenah lehkha thawnin, vote chhiar ní chu Thawhṭanni leh Zirtawpni inkara eng ni berah emaw sawn turin a ngen a; "Pathianni hi Mizoram mipui tan ni thianghlim a ni a, Pathian biak ní a ni," tiin, Mizoramah chuan Pathianniah sumdawnna leh official programme dangte tih a nih ngai loh thu a tarlang.

MNF party chuan an general secretary TC Kaphmingthanga hmingin vote chhiar ní sawn tura ngenna ECI-ah ziakin an thlen a; Mizote chu Kristian vek an nih thu tarlangin, "Pathianni hi Kristiante tan ni pawimawh a ni a, Mizoram pumah biak-inah inkhawm ṭhin a ni. Chuvangin, vote chhiar hun hi December 4, 2023 (Thawhṭanni)-ah sawn turin kan ngen a ni," an ti.

MNF party chuan, ECI-in Mizoram inthlan vote chhiar hun atana Pathianni a ruat chu ṭha lo an tih thu leh Mizo Kristiante palzûtnaa an ngaih thu an tarlang.

Congress ṭhalaite pawhin thuchhuah siamin, vote chhiar ni atana December 3, Pathianni ruat a ni chu an duh loh tak zet thu an tarlang a, "Kristiante ni pawimawh ngaih pawimawh loh leh zah lohna lian takah kan ngai a, December 3, 2023 hi khawvel puma Kristiante ni pawimawh Bible Sunday a ni. Vote chhiar ni sawn leh ngei turin ECI kan phût," an ti.

PC party chuan thuchhuah siamin, vote chhiar ní atana December 3, Pathianni ruat a ni chu an pawm loh thu an tarlang a, "Kristiante ni serh palzûtnaah kan ngai a, a rang thei ang bera vote chhiar ni sawn turin ECI kan ngen a ni," an ti a; sorkar laipuia BJP-in sorkarna an chelh aṭangin Pathianni palzûtna a nasa niin an sawi bawk.