Zalenna sual lo anga min puhtute hi tel ve lote an ni - Zoramthanga

MNF president Zoramthanga chuan, MNF-te'n zalenna an sual lo anga sawitute chu zalenna sual laia tel ve lo leh tel tluan peih lote an nih thu sawiin, MNF-in zalenna an sual ngei niin a sawi.

Zoramthanga hian nimina Mizo Hnam Rûna inkhawmah thu sawiin, "Independent sual lo tia min puhtute hi kan sual laia tel ve lo leh tel tluan peih lote an ni. Kum 1966-ah independent kan sual a, kum 20 chhung kan inkâp. Ram tan zalenna an sual lo min ti ṭhin mah se, hnam martar thlânmual heti zat kan neih hian ram tan zalenna kan suàl chu a tichiang," a ti.

MNF President chuan, Mizoram chu India ram leiba nei tlem ber dawttu state a nia sawiin, "Heti chung hian ba tam berah min chhuah lui tlat. Min beitute hian min beihna dang hre loin, kalphung thar min enchhin teh u tih bak sawi tur dang an hre lo," a ti a, a rei tulh tulh a, enchhin tum lo an tam tulh tulh niin a sawi.

MNF adviser Dr R Lalthangliana pawhin roreltu tur enchhin chi a ni lo nia sawiin, "Tih fuh loh chuan kum hnih pawh a rei lutuk. Keini chuan kan tih mek leh tih tawhte aṭangin min teh se kan duh zawk," a ti.

Dr R Lalthangliana chuan, Assembly House-ah kum 30 chuang a ṭhut tawhah kum 2018-2023 term anga hun khirh bik a la tawn ngaih loh thu sawiin, "A hun takah hun khirh laia kaihruai turin leader ṭha Pu Zoramthanga Pathianin min pe a ni... Kan CM hi zui tlâkzia kan hre chiang tulh tulh a ni," a ti a; Covid-19 léng leh harsatna thlentu dangte a sawi lang.

Nimina Mizo Hnam Rûna inkhawmah hian MNF zawm tharte an lawm lut a, chu'ng zingah chuan AMC chairman hlui Zarzoliana pawh a tel a ni.