KHAWTHLIR

Thisen pe

2nd Battalion MAP-te chuan an din champha vawi 36-na pualin nimin khan Civil Hospital, Lunglei tan thisen unit 23 an pe a, petute mipa 22 leh hmeichhia pakhat an ni.

D.Litt. zo

Mizoram University Commerce department-a zirtirtu Prof. Laldinliana Varte chuan Livingstone International University of Tourism Excellence and Business Management (LIUTEBM), Lusaka, Zambia aṭangin kutkawih eizawnna (entrepreneurship) huangah doctor of literature (D.Litt.) a zo a, Mizo zingah D.Litt. dawng hmasa ber a ni. Kum 2011 khan MZU hnuaia Ph.D (Commerce) dawng hmasa ber a ni tawh bawk.

Lei chhùng khawm

India ramin zalenna a hmuh kum 75-na champha lawmna puala ‘Meri Maati Mera Desh' campaign kal zelah nimin khan Lawngtlai DC pisa tualah Lawngtlai district khaw hrang hrang aṭanga lei lakte chhùn khawm a ni. Lei lak khawmte chu Karavya Path hmunah martarte huan, Amrit Vatika siam nan hman a ni ang.

Dy CM-in vailiam

MSU Gen.Hqrs huaihawt Project Mizoram hnuaiah Sialhawk damdawi-in (PHC)-a pek tur damdawi hmanrua hrang hrang chu nimin khan deputy chief minister Tawnluia'n a in kawt aṭangin a vailiam. Project Mizoram hnuaia hmanruate chu USA aṭanga chah luh a ni a, Rs 1,50,000 man a ni. Deputy CM hian Sialhawk PHC-a hman tur tarpauline a pe bawk.

Inthlanpui sawipui

Saitual district election officer Dr Lalngura Tlau, DC chuan nimin khan November 7, 2023-a MLA inthlanpui neih tur chungchangah Saituala thuthar thehdarhtu te, khawtlang leh pawl hruaitute a kâwm. DC hian inthlan kaihhnawiha an inpuahchah dante a sawi bakah, inthlan hun puan a nih rualin sector magistrate-te'n Saitual khaw chhung an fan kual ṭan nghal thu a sawi.

ZPM inkhawm

ZPM party chuan nimin khan an pisaah chhung inkhawm hun an hmang a, general secretary RD Lalrammawia'n thu sawiin, "Kan sorkar huna tih ngei kan tum pawimawh tak tak pasarih kan nei a, ram rorelnaa Pathian ram tun din, sorkar kalphung thar mipui sorkar siam, ram, hnam leh sakhaw himna tura beih, politics khelh dan thianghlim lantir, rorelna dik a awm theihna tura beih, collective leadership lantir leh Zo fate rorelna pakhat hnuaia dah tura beih tihte a ni," a ti.

Lungphùm phúm

Champhai South bialtu MLA TJ Lalnuntluanga, minister of state chuan nimin khan Champhai Tlangnuam Vengtharah Zomi Cultural Centre & Preservation of Historical Sites sakna tur lungphùm a phúm. Project atan North Eastern Council sum nuai 478.69 ruahman a ni a; Ṭhasiama Seno Neihna humhalh leh Vangchhiaa waiting shed sakte pawh a keng tel a ni.

Mini theatre hawng

Minister Lalruatkima chuan nimin khan Dinthar vengah Aizawl Mini-Theatre a hawng a, Mizoram Film Forum buatsaih shooting location bu a tlangzarh bawk.

College Week

Champhai College chuan nimin khan Zotlang Sports Stadium-ah College Week an hmang ṭan a, Champhai South bialtu MLA TJ Lalnuntluanga, minister of state-in a hawng. Champhai College-ah hian zirlai 740 an awm mek a, College Week hi October 16, 2023 thleng an nei dawn a ni.