SEDP sem chhunzawm theih a ni lo, MNF sala tángte tan zalenna dár a rî - MPCC Thupuangtu

Mizoram Pradesh Cong­ress Committee (MPCC) chief spokesperson Ronald Sapa Tlau chuan, Mizoram inthlanpui puan ruala Model Code of Conduct hman a nih avangin SEDP sem chhunzawm theih a nih loh thu leh MNF thlêmna sala tángte tan zalenna dár a rîk tâk thu a sawi.

Ronald Sapa Tlau hian nimin khan Congress Bhavan-ah thuthar thehdarhtute a kâwm a; inthlanpui puan rualin Model Code of Conduct hman ṭan nghal a nih thu sawiin, "ECI chuan MNF sorkar SEDP chu sem zawm theih tawh loh, vui liamna thu puangin, harsat luat vanga MNF thlemna sala tángte tan zalenna dár a ri ta," a ti.

Congress party thu­puangtu chuan, Election Commission of India-in vote chhiar ní atana Pathianni a ruat chu Kristian sakhua zah lohnaah an ngai a, vote chhiar ni tura ruat chu sawn a nih hma chuan an do dawn tih a sawi.

Kumin MLA inthlan-pui hun chu ṭum dang aia thla khat dáwna a hma chhan sawiin Ronald Sapa chuan, "Central BJP-in partner-a a hnâwl tak MNF party ni tin a rawih mek lai leh ZPM leader boruak hniam mek si hi central BJP-in Mizoram Congress tho leh mek sawpchhiat nana an hmanraw hual, ZPM puih tlak an nih lai ngeia rîk phut an duh vang a ni," a ti.

MPCC spokesperson chuan, tlem laia ZPM Leader phone call thehdarhah BJP thawhpui a duh dan a sawi thu te, Mizorama BJP unit thlawh khûma central BJP thawhpui a duhzia Siaha mipui hmaa a puan thute a sawi a, "Kristiante hmelma lian ber BJP chu a hmui themthiamna hmanga a la sawichhiat ngam miah loh dan aṭang hian tun inthlana inmamawh ve ve an ṭanho hi thil chîktute rin dan a ni," tiin a sawi.

Ronald Sapa Tlau chuan, "Dinchhuah duh ve si, rethei mangangte tan kan party President-in kawngkapui zau takin a hawng a, hei vang hian Zoram politics dinhmun a inher danglam mek. Dinchhuah tak takna tur kan manifesto rawn bèl duh zawng zawngte Congress party-a láwi turin mipui kan sawm a che u," a ti. Congress party manifesto chu rei lo têah an puang dawn niin a sawi bawk.