Campaign-naah ṭawih thei lo hmang lo turin DC-in a ngen

Aizawl district election officer Nazuk Kumar, DC chuan nimin khan DC conference hall-ah thuthar thehdarhtute a kâwm a; Election Com­mission of India-in political party leh can­didate-te chu hman khat daih sarâng leh ṭawih theih lo hmanrua hmanga campaign kalpui lo tur leh environment tana him hmanrua chauh hmang turin a ngen tih a sawi.

Nazuk Kumar chuan, hriselna leh environment venhim a nih theih nan political party tinte'n single use plastic hmanga campaign-na hmanrua/bungrua an siama an hman loh nan hma an lak a ngaih thu a sawi a, "ECI chuan political party leh candidate-te chu single use plastic leh ṭawih theih lo hmanrua hmanga campaign lo tur leh environment tana him hmanrua chauh hmang turin a ngenin a beisei a ni," a ti.

Kumin inthlanah postal ballot/home voting facility neih a nih dawn thu sawiin DC chuan, "Hei hi PwD voter (rualbanlo) leh kum 80 chung lamte hnenah pek tel a ni ang. Returning officer pakhat leh assistant returning officer pakhat ruat ṭhin pawh he ruahmanna hi tluang tak leh fel taka kalpui a nih theih nan hemi pual atan hian constituency tinah additional ARO ruat a ni," a ti.

Nazuk Kumar chuan, candidate-te sum hman dan ngun taka vil turin assembly constituency tinah assistant expenditure observer pakhat ṭheuh, flying squad pathum ṭheuh, static surveillance team pathum ṭheuh, video surveillance team pakhat-pathum ṭheuh, video viewing team leh accounting team pakhat ṭheuh dah a nih dawn thu a sawi bawk.

Aizawl Bawrhsap chuan, tluang leh felfai taka inthlan a nih theih nan thawhpuiah mi tin a sáwm a; inthlanna zalen, thianghlim leh mi tin huap neih a nih theih nan inrem taka thawkpui zel turin media-te a ngen a ni.

BAWRHSAP SAWI DANGTE

▶ Constituency tinah hmeichhiain an vil polling station (pink polling station) pathum ṭheuh siam tum a ni.

▶ Critical polling station tinah leh polling station awm zawng zawng zatve (50%) aia tlem loah webcasting tih tum a ni.

▶ Excise & Narcotics department-in khauh takin MLP Act an kengkawh dawn.

▶ Media centre changtlung tak DEO office-ah din tum a ni.

▶ Social media hman sual leh paid news-te vil turin Social Media Cell din a ni a, electronic, print leh social media-a thu chhuakte ngun takin an vil dawn.

▶ Vote chhiarna tur MLA bial tin tan counting hall pakhat zel ruahman a ni a, a bul hnaiah strongroom buatsaih tawh a ni.

▶ Counting hall tinah counting table 8-14 a awm dawn.