Aizawlah Florists' Fair neih mek a ni

Mizoram Florists' Association (MFA) chuan nimin khan Aijal Club Park-ah Florists' Fair an buat­saih a, MJA president C Lalrambuatsaiha'n a hawng.

Florists' Fair hi October 13, 2023 thleng neih tur a ni a, dawr 70 vel hawn a ni. Pangpar chi hrang hrang, pot, leiṭha, thlai ṭiak, pangpar ṭiak leh pangpar kaihhnawih chi hrang hrang zawrh a ni a, tlawh turin MFA chuan mi tin an sáwm.

Florists' Fair hawnna inkhawm hi MFA treasurer Lallawmchhungi'n a kaihruai a; MJA president C Lalrambuatsaiha chuan, khawvel thil mawite ngaihtuah apiangin rilruah pangpar a lang ṭhin tih sawiin, "Ram mawi leh ram hmuhnawmte reng reng hi pangpar mawi tak tak vulna a ni zel. Pangpar hi khualzin hîpna atan a ṭha em em a, pangpar hi tourist industry mai ni tawh loin, industry pakhat a ni tawh. Mizoramah pawh pangpar hi eizawnna tling tak a ni tawh," a ti a; khawvela pangpar mawi ber berte chaw lut zel a, Mizoram tivul zel turin duhsakna a hlan.

MFA hi November 1997-ah ding ṭanin, headquarters-ah member 500 chuang an awm a, khaw hrang hrangah branch 27 an nei bawk. Kum 1999 aṭangin kum tin flower show/fair an buatsaih a, kum khatah vawi lite pawh an buatsaih ṭhin a ni.