World Mental Health Day hmang

Nimin October 10 kha World Mental Health Day a ni a, Health department hnuaia National Mental Health Programme chuan Directorate of Hospital and Medical Education conference hall-ah an hmang. Mental health programme pantute zingah ruihhlo kaihhnawih vanga rilru lam buaina an tam ber tih tarlan a ni.

Health department-in National Mental Health Programme data-a an tarlan danin, kum 2019 aṭanga 2023 thlengin district Mental Health Programme pantute zingah ruihhlo kaihhnawih rilru lam buaina (psychoactive substance use) sang berin, 32% vel a tling. Anxiety, stress leh a dangte'n dawtin 16% vel a ni a, 14% vel chu mood disorder-depression leh bipolar disorder an ni bawk.

Rilru hriselna lam inzirtirna leh rilru lam natna kaihhnawih vanga harsatna thleng theite inzirtirna hun, World Mental Health Day hmanna hi National Mental Health Programme state nodal officer Dr Robert L Khawlhring-in a kaihruai a; Blessino Nursing School, Synod College of Nursing leh Aizawl West College zirlaite telin, rilru hrisel neih pawimawhzia leh rilru lam harsatnain nghawng pawi a neih dante zirtir an ni.

Tele Manas counsellor C Lalhruaitluangi chuan rilru lama buaina leh harsatna neite puitu tura buatsaih Tele Manas chungchang a sawifiah a; Tele Manas toll free number 14416-ah eng lai pawhin harsatna thlen theih a nih thu a sawi.

Alzheimer's & Related Disorders Society of India (ADRSI), Mizoram president Vanneihtluanga pawhin thu sawiin, khawvel hmun tinah danglam bikna vanga inthliarna (stigma) avangin harsatna a thleng reng tih a sawi a, "Rilru lama harsatna kan tihte hi tute chungah pawh thei thil a ni. Hemi kawngah hian kawng su êng turin zirlaite hi ambassador in ni thei a ni," a ti.

Inkhawmah hian resource person - T Romana College principal Dr Jennifer Lalbiakdiki, CID (Crime) additional SP Lalṭhakima, MJA president C Lalrambuatsaiha, Health joint director Dr Ruth Lalmuanpuii, National Tobacco Ccontrol Programme legal consultant Vanlalzari ten thupui hrang hrang an sawi a; zawhna leh chhanna hun hman a ni.

World Mental Health Day pualin National Mental Health Programme chuan drama inziahsiak an buatsaiha ti ṭhate hnenah lawmman hlan a ni bawk.