MNF-in an intiam pakhat mah tihlawhtling loin an hun an liampui dawn - Lal Thanzara

Mizoram Pradesh Congress Committee (MPCC) senior vice president Lal Thanzara chuan, Congress party chu Pathian rin chhanin an ding leh dawn tih a sawi a; MNF party chu an intiamna pakhat mah tihlawhtling loin an sorkar hun a liam dawn niin a sawi bawk.

Lal Thanzara hian October 8, Thawhṭanni zan khan Edenthar Venga BSUP-a hun a hmannaah, inthlan a hnaih avangin an elpui party dangte'n an hmangaih thar thut dawn thu a sawi a, "BSUP dinsaktu che u Congress party hi lo thlang tling leh ṭheuh turin ka ngen che u. In tan a nih piah lamah Mizoram mipui tan sakhaw zalenna duhtu Congress party hi Pathian rin chhanin kan ding leh dawn a ni," a ti.

MNF party-in SEDP hnuaiah Rs 3,00,000 sem an intiam tih sawiin, Lal Thanzara chuan, "MNF party hian an intiamna pakhat mah tihlawhtling loin an sorkar hun chhung an liampui dawn. An vanduai a, mi fel MLA ṭha tak tak an nei chungin mipui rintlak sorkar an nih lohzia a lang chiang hle a ni," a ti a, Rs 3,00,000 tiamtute'n Rs 25,000 chauh an sem thu a sawi.

Lal Thanzara chuan, "MNF sorkar hnuaiah Pu Zoramthanga hoa kuttling loa sum lak a tamzia te, vai contractor an hausakziate hi Mizoram mipuiin ngaihtuah chiang ang u. Kawng chhâwng pawh a awm tawh em ni?" a ti a; ZPM chungchangah an leader Lalduhoma chu a party din pawh chhuahsantu a nia sawiin, "Mizoram mipuite'n enchhin kan ba lo a, a thusawi tam tak leh amah a dik tawk lohzia hi enchhin ngai loin a lang sa tawh a ni," a ti.

MPCC Senior Vice President chuan, BJP chu India rama Hindu lal ram din tumtu an nia sawiin, "Missionary-te dinhmun an tichêp mek," a ti a; "BJP leh an thawhpui MNF-te hnâwl a ngai a, nakin lawka BJP thawhpui tumtu ZPM pawh kan hnâwl a ngai a ni," a ti bawk.