Economics & Statistics golden jubilee lawm

Economics & Statistics department chuan nimin khan directorate conference hall-ah kum 50 an tlinna, golden jubilee an lawm a; chief secretary Dr Renu Sharma-i'n hmanpuiin, jubilee lungphun a hawng a, Statistical Handbook Mizoram 2022 leh Meteorological Data of Mizoram 2022 a tlangzarh bawk.

Dr Renu Sharma chuan, Economics & Statistics department chu statistics leh a kaihhnawih thilah nodal agency a nih avangin ṭan la zel turin thawktute a fuih a, "Department-in thupuia in hman, 'One state one statistics' hi a pawimawh hle. State-in data dik kan neih zel theih nan thawktute bakah, sorkar department dang zawng zawng, tlawmngai pawl leh pawl dangte'n ṭan an lak ṭheuh angai," a ti.

Jubilee lawmnaah hian Economics & Statistics director ni tawhte leh programme hmang tura sawmte hnenah ngaihhruina hlan a ni a; director thi tawhte sûnna hun hman a ni bawk.

Economics & Statistics hi March 1, 1973-ah pisa hran neiin a ding ṭan a; golden jubilee lawmna pualin consultative meeting, cyclothon leh workshop-te buatsaih a ni tawh.