Sorkar sikula dah thar Darlawnah lawm

Mizoram Govt. Adhoc Aided Higher Secondary School Lecturers' Association (MIGAAHSSLA) chuan nimin khan Darlawn Chhimveng Town Hall-ah tun hnaia Mizoram sorkarin adhoc aided higher secondary school 12-te sorkar sikula a dah lawmna an buatsaih a, School Education director Lalsangliana'n a hmanpui.

School Education Director chuan, dinhmun sang zawka sikul dah chuan zirna ṭha siamnaah rah ṭha a chhuah a beisei thu sawiin, "Board exam-ah result ṭha an chhuah ka beisei. Thingtlanga thawkte'n khawpuia insawn dil lo tur leh thingtlang zirlaite hian lehkhathiam hi an chanvo a ni tih hre turin zirtirtute ka chah a ni," a ti.

Lalsangliana chuan, Mizoram sorkarin middle school, high school leh higher secondary school 180 sorkar sikula a dah thar chungchangah, "Hripui vanga sum harsatna karah thutlukna hautak leh harsa ber siam a ni," a ti a; sikul 180-a thawk mi 1,422 sorkar hnathawk ni tura seng luh an nih thu a sawi.

Mizoram sorkarin adhoc grant-in-aid HSS ni ṭhin sikul 12 sorkara a dah tharte chu - Public HSS (Ramhlun Venglai), Durtlang HSS, Zohmun HSS, Ngopa HSS, Cherhlun HSS, Thingsai HSS, Khawzawl HSS, Biate HSS, Kawnpui HSS, Noth Vanlaiphai HSS leh Thenzawl HSS-te a ni a; heng sikulah hian zirtirtu 170 an awm a ni.