Aizawlah SVEEP zirhona buatsaih

Lok Sabha MP C Lalrosanga chuan nimin khan Aijal Club-ah Ministry of Information and Broadcasting hnuaia Press Information Bureau buatsaih, 'Media Workshop Vartalap on SVEEP' a hmanpui a; journalist-te chu ṭan bik nei loa lái taka an awm a ṭul thu a sawi.

C Lalrosanga chuan, kumina MLA inthlanpui awm turah muanawm leh thianghlim taka inthlan a nih ngei a beisei thu a sawi a, "Thuthar thehdarhtute hi mipuite'n thil thar an hriatna kawnga an pawimawh ang bawkin, thu dik tak an hriat theih nan an pawimawh em em. Ṭan bik nei loa lai taka awm hi journalist-te tih tur a ni a, news an chhuah reng rengah party ṭan lam an tihlan loh chu an tih tur a ni," a ti.

Tunlaiin social media-ah thu belhchian dâwl lo tam tak thehdarh a nih ṭhin thu sawiin Lalrosanga chuan, mipui hnena thu dik thehdarh zel turin thuthar thehdarhtute a chah a, "News awm sa reng her danglama mipui rilru her danglam tum an awm ṭhin hi a pawi," a ti a, inthlan a hnaih tawh avangin fimkhur zual a pawimawh thu a sawi bawk.

Zirhonaah hian Press Information Bureau, All India Radio leh Doordarshan hotute leh Indian Institute of Mass Communication, Mizoram zirlaite bakah thuthar thehdarhtute an tel a ni.