District-ah High School Sports ṭan a ni

Nimin khan Champhai leh Hnahthialah district high school sports ṭan a ni a, district chhunga high school zirlaite infiamna chi hrang hrang hmangin an intihsiak a, October 13, 2023-ah khàr a ni ang.

Champhai District High School Sports vawi 19-na chu nimin khan Champhai DC James Lalrinchhana’n Chhangphut Field-ah a hawng a, Champhai district-a zirlaite chu Mizoram huap intihsiaknaah pawh a ti ṭha berte zinga mi an nih ṭhin thu sawiin, district aiawha ṭha taka la khel zel thei tura ṭan la turin a fuih.

Champhai District H/S Sports-ah hian sikul 38 an tel a, sorkar sikul 30 leh mimal sikul pariat an ni a; infiamna chi 11 - football, volleyball, badminton, table tennis, basket ball leh athletics chi hrang hrangah October 13, 2023 thleng an intihsiak dawn a ni.

Hnahthial District Secondary School Games vawi thumna chu Hnahthial Volleyball Court-ah district education officer Micky Lalenkawla'n a hawng a; thu sawiin, H/S Games chu sikul leh sikul inelna leh inerna ni loin, Mizoram pum huap Secondary School Games neih tura Hnahthial tihmingṭhatu an chhuahna atana buatsaih a nih thu a sawi a, "Inunauna leh inṭhian ṭhatna thar a pian chu duhthusam a ni," a ti.

Hnahthial District H/S Games-ah hian district chhunga H/S 18 aṭangin zirlai 720 an tel a, infiamna chi hrang hrang discipline-ah an intihsiak dawn a ni.