KHAWTHLIR

ZPM candidate

ZPM party chuan November 7, 2023-a Mizoram Legislative Assembly inthlanah Tuichawng biala an candidate atan nimin khan Shanti Jiban Chakma s/o Ranga Chandra Chakma, Geraguluksora an ruat. Shanti Jiban Chakma hi Chakma Autonomous District Council-ah chief executive member hlui a ni a, Chakma district-a ZPM president ni lai a ni bawk. Heti hian ZPM chuan Mizoram assembly constituency 40-a an candidate turte an puang kim tawh a ni.

Zirtirtute zirtir

Mizoram University-a Department of Psychology leh Mizoram Samagra Shiksha chuan nimin khan Synod Conference Centre-ah Aizawl khawpuia adhoc aided leh private sikul hrang hrang zirtirtute tan World Mental Health Day pualin 'Workshop on Psychological First Aid' an buatsaih. Zirlaite zinga rilru lama harsatna neite puih dan tur leh hmalakpui theih dan te, counselling neih dan te, naupangte harsatna chungchang leh psychological first aid-te an zirtir a ni.

Kawng khâr dawn

Ainawn Venga Bethel Road (RB Point)-ah pipe phûm a ni dawn a, October 25, 2023 thleng kawng khâr a nih dawn thu Traffic SP chuan a tarlang.

Archives Association

Mizorama thil vawn ṭhat (record/archive) ngai pawimawhtute chu nimin khan State Archives Hall-ah an kal kawm a, Mizoram Archives Association dinin, pawl inkaihhruaina tur an siam nghal. Pawl tharah hian zirna-in leh kohhran pawl ṭhenkhata record enkawltu leh record vawnṭhat ngai pawimawhtute an tel a; president atan F Lal­thanmawia an ruat a ni.

RTI Week hmang

Nimin khan Lunglei, Kolasib leh Saitualahte Right to Information Week hman a ni. Lungleiah bawrhsap Ramdinliani'n a hmanpui a, Kolasib-ah bawrhsap John LT Sanga'n hmanpuiin, Saitualah bawrhsap Dr Lalngura Tlau khuallian a ni. Week hmannaah hian RTI Act buaipuitu sorkar official te, pawl hrang hrang aiawhte leh zirlaite an tel a; RTI Act chungchang inzirtir a ni.