Assembly speaker Rinliana a bâng; Term kal mekah MLA 8 an bâng tawh

Assembly speaker Lalrin­liana Sailo chuan MLA aṭanga bànna nimin khan Assem­bly Commissioner hnenah a thehlut a, ani nen hian MLA term kal mek, Mizoram State Legislative Assembly pariatnaah mi pariatin MLA aṭanga bànna an thehlut tawh.

MLA aṭanga bànna a thehluh zawhah thuthar thehdarhtute zawhna chhángin Lalrinliana Sailo chuan, BJP a zawm tur thu leh a zawm chhan tur a sawi a, "State hrang hrangah meeting-in ka kal a, central-ah BJP an sorkar leh ngei dawnin a lang a, Congress MP-te pawhin an ring. Chuvangin, BJP sorkar aṭangin Mizoram chhanchhuahna kan neih a ngaiin ka hria," a ti.

Lalrinliana Sailo chuan, Mizoram sum leh pai dinhmun a ṭhat loh thu sawiin, "15th Finance Commission-ah phei chuan kan chhe em em a, central aṭanga kan sum hmuh tur a tlahniam zel a ni," a ti a, sorkar laipui puihna tel lo chuan Mizoramin hma a sâwn tak tak theih loh thu a sawi.

Assembly speaker a nih chhungin MLA pariat an bàn thu sawiin Rinliana Sailo chuan, "A hrehawm ka ti khawp mai, awm reng pawh a nuam ka ti tawh lo. Chuvangin, a pakuana atan bànna ka thehlut ve a ni," a ti.

MLA aṭanga Lalduhoma a bàntir chungchanga zawhna chhangin Lalrinliana Sailo chuan, "Mittui nen hrehawm ti takin kan bàn. Ṭhiante MLA aṭanga han bàn chu thil hrehawm tak a ni. Min ngen angin ṭum hnih chu bàn hun tura ka tih ka pawtsei a ni," a ti a, Lalduhoma nen an inkar a ṭhat thu a sawi.

Lalrinliana Sailo chuan, Hachhek tlangdunga kuhva chíngtute harsatna chungchang Assam chief minister Himanta Biswa Sarma nen an sawi dun tih sawiin, "BJP kan zawm a nih chuan kuhva chíngtute'n harsatna an tawh lohna atan theihtawp min chhuahpui a tiam. Kut hnathawktute tan a ni a, hei ngawt pawh hi BJP zawm chhan tlakah ka ngai," a ti.

Lalrinliana Sailo sawi danin, BJP a zawm chhan tur dangte chu - Mizoram sorkarin kum tin cheng vbc. 100 tél a sênna ṭhin Zoram Medical College chu sorkar laipuiin lak an tiam vang te, ramria sumdawnna chak zawka a kal theih nan sorkar laipui nen thawhhona ṭha an neih theih dawn vangte a ni.

Assembly Speaker nen hian MLA term kal mekah MLA pariatin bànna an thehlut tawh a; a hmain KT Rokhaw, Dr K Beichhua, Vanlalhlana, C Lalsawivunga, VL Zaithanzama, Dr Vanlalthlana leh Lalchhuanthanga ten bànna an thehlut tawh a ni.

Hetih lai hian, MLA 12-in an hêk avangin Lalduhoma chu November 27, 2020 khan MLA aṭanga bàn a ni a, April 2021-a by-election-ah MLA atan thlan tlin leh a ni thung.