India rama leiba ngah ber state kan ni; CM-in mipui bum a tum - CLP Leader

Congress Legislature Party (CLP) leader Zodintluanga Ralte chuan nimin khan Aizawl Press Club-ah thuthar thehdarhtute a kâwm a; Mizoram chu India rama leiba ngah ber state a nih thu leh leiba chungchangah chief minister Zoramthanga'n thu dik tâwk lo hmanga Mizo mipui bum a tum thu a sawi.

Zodintluanga Ralte chuan, Reserve Bank of India-in data a tihchian tawh (actual) hnuhnung bera a lan danin, Mizoram leiba chu Gross State Domestic Product (GSDP) aṭanga chhûtin 56.7% a nih thu a sawi a, "India rama leiba ngah ber kan ni. Data hnuhnung ber, la danglam thei 2023 (budget estimate)-ah pawh GSDP aṭanga kan leiba tura chhût chu 53.1% a ni a, India rama leiba ngah ber kan ni dawn tho. Kan leibat dan enin actual a chhuah hunah chuan 53.1% aiin a sang ngei dawn tih a chiang," a ti.

Leiba ngah lutuk vangin Chief Minister-in tehna dik lo hmangin mipui bum a tum nia sawiin CLP Leader chuan, "Kan CM hian Mizo mipui min zahlo a, tun hma anga bum mai mai theihah mipui hi min ngai niin ka hria, a rilru natthlak tak zet a ni," a ti a; khawvel leh India ramin leiba tam zawng tehna a nei a, chu chu GSDP aṭanga chhût a nih thu a sawi.

(Phek 2-ah zawm a ni)