KHAWTHLIR

Department hming thlak

September 27, 2023-a Council of Ministers ṭhukhawmin thutlukna a siam angin, General Administration department chuan Social Welfare & Tribal Affairs department tih chu Social Welfare, Tribal Affairs, Women & Child Development department tia thlak a nih thu a tarlang.

Raltlan tanpuina

North America Mizo Christian Fellowship (NAMCF) chuan Zo hnahthlak ráltlânte ṭanpuina atan nimin khan Central YMA hnenah Rs 4,20,000 an thawh. Ṭanpuina sum hi NAMCF treasurer pastor Vana Chawnhlut-in CYMA president R Lalngheta hnenah a hlan a ni.

BJP-in ECI ngen

BJP, Mizoram Pradesh president Vanlalhmuaka chuan nimin khan Election Commission of India hnenah lehkha a thawn a, Mizoram inthlanpuia vote chhiar hun tura ruat December 3, 2023 chu Pathianni a nih avangin dawn turin a ngen. Vote chhiar ni sawn tura ngenna hi INC, MNF leh ZPM party aiawhte pawhin a hran ṭheuhin ECI hnenah an lo thlen tawh a ni.

MCC sawiho

Mamit district election officer VL Remliana hoin nimin khan kumina MLA inthlanpui lo awm tura Model Code of Conduct leh Expenditure Monitoring chungchangah returning officer leh political party aiawhte an ṭhukhawm. DEO chuan MCC ngai pawimawh a, inthlanna thianghlim leh felfai a awm theih nana ECI inkaihhruainate uluk taka zâwm turin political party aiawhte a ngen a, rate notification a sem nghal a ni.