Pathian ram thlen nan kohhran mite'n politics an luhchilh a ngai - Duhoma

ZPM leader Lalduhoma chuan, "Kan ram inrêlbâwlna hi kan siamṭhat ngei ngei a ngai," a ti a, ram rorelnaah Pathian ram a thlen a ngai a, Pathian ram a thlen theih nan chuan kohhran mite'n politics an luhchilh a ngaih thu a sawi.

Lalduhoma hian nimin khan West Phaileng Dinthar kâwnah vantlang inkhawmah thu sawiin, Pathian tel lo hmasawnna a khingbai tih a sawi a, "Kan ram rorelnaah Pathian ram a thlen kan duh em em a, rorelna fel leh thianghlim a awm theih nan theihtawp kan chhuah. Ram rorelnaah Pathian ram a thlen loh chuan Pathian malsawmna kan dawng thei lo a, Pathian ram a lo thlen theih nan chuan kohhran mite'n politics kan luhchilh a ngai a, kan ram inrêlbàwlna hi kan siamṭhat ngei a ngai a ni," a ti.

Ram siamṭhatnaah kohhrante'n hna an thawk nasa tih sawiin Duhoma chuan, "Hma a la nasa em em a, kan khawtlang nun a ṭhat theih nan pawh hma a la nasa hle. ZPM hi a chhe lam an sawi tam tiin min bei ṭhin a, a chhe lam pawh hi sawi a ngai a, kan dinhmun hi a nihna dik tak kan sawi a ngai a ni," a ti a; ruih theih thil lakah Mizoram leh ṭhalaite chhan chhuak turin ṭan rual a ngaih thu a sawi.

Lalduhoma chuan, Mizorama Pathian ram a thlenna tura dâltu lian tak chu NDA leh an sangáwi zawnpuite an nih thu sawiin, "Kan ramah hian BJP hi a party ang chuan an hlauhawm tham lo a, mahse, NDA zawmtu MNF-te hian ram leh hnam pawi an sawi a, an tih loh tawp tur an ti a ni. Kan ram tana pawisawitute hi kan chhuahsan a ngai... Kan thawhrim a ngai a, sem ni loin, thawhrimna hmangin kan ram i siam ang u," a ti.

ZPM Leader chuan, tun hma lam chuan mipuite'n sorkara tura an duh ni loin sorkar siam tura an rin an vote tlangpui tih sawiin, "Vawiinah hian mipui titi leh hawiher ngun taka en chuan, mipui hian ZPM hi sorkar turin min ring ta ber a, hei hi ruling party leh party dang pawh hian an pawm niin a lang," a ti a; ZPM-in policy mumal tak an neih thu leh an sorkar chuan chief minister-in work department a chan dawn loh thu a sawi bawk.

Vantlang inkhawmah hian Dampa biala ZPM candidate tur Vanlalsailova pawhin thu a sawi a; Lalduhoma hian ZPM zawm thar mi 568 a lawm lut niin ZPM thuchhuah chuan a tarlang.