Inthlana venhimna chungchang sawiho

Champhai district election officer James Lalrinchhana, bawrhsap kaihhruaiin nimin khan DC conference hall-ah November 7, 2023-a Mizoram MLA inthlanpui neih tur pualin enforcement agency-te an ṭhukhawm a, inthlanpui neih huna venhimna hna thawh dan turte an sawiho.

Ṭhutkhawmah hian Champhai district-a inthlan kaihhnawih dan leh thupek kenkawhnaa hmalakna kal mek leh inpuahchahna te, danin a phal loh thil tawlh rûk awm thei vên dan tur te, intelligence chungchanga hmalak ṭul te, dan bawh-chhiatna a awm lohna tura enforcement agency hrang hrangte mawhphurhna leh an thawhho dan turte sawiho a ni.

Champhai DEO hian nimin vêk khan DC conference hall-ah mobile service provider - Jio, BSNL leh Airtel bakah, bank - SBI, MRB, HDFC, Punjab National Bank, Canara Bank leh Apex Bank hotute a kâwm. Mobile service petute chu inthlan vuakvêtah inbiakpawhna a khaihlak loh nan a ṭul anga hma la turin a chah. Champhai district-ah mobile signal awm lohna hmun a awm loh thu tarlan a ni.

Bank hotute chu political party hrang hrang candidate-te account hawn leh cheque book pek chhuah leh, bank dawr an mamawhna hrang hrangahte harsatna an tawh loh nan theihtawp chhuahpui tura chah an ni a; inthlan vuakvetah bank account chêt vel dan uluk taka vil a, rinhlelhawm a awm chuan thuneitute hnena hriattir vat turin a chah bawk.

Kumina MLA inthlanpuiah hian candidate-te chu cheng nuai 28 aia tam lo hman phalsak an ni a, inthlannaa hman tur bik bank account an hawn a ngai a ni.