Sumdawnna lirthei tlàntir loh tihtàwp a ni

Joint Action Committee on Pliable Road (JACPR) chuan Mizorama kawngpui chhe lutuk vang leh kawngpui chhe zual laite chak zawka thawm ṭhat a nih theihna atana October 9, 2023 (Thawhṭanni) aṭanga sumdawnna lirtheite an tlàntir loh chu nimin khan an titawp.

JACPR chuan, kawngpui thawm ṭhat hna chak taka thawh a nih theih nan JAC mi leh sate chhun zan zawmin an duty ṭhin tih tarlangin, "Tlaivar ṭhakin hnathawk tibuai thei tur te, hnathawh laklawh lai tihchhiat leh mai theihte venpui a ni. Hna thawktute pawhin hna chak takin an thawk thei a, kan lawm hle," an ti.

Ṭha taka an duty lai leh an ngennate mipuiin ṭha taka an zawm laiin, Kolasib leh Vairengte lama duty-te chu Kolasib DC leh SP-te'n inthlan puan a nih tawh avanga harsatna an tawh theih thute chhuanlama hmangin duty titawp tura na taka an nawr thu an tarlang.

Sorkar thuneitute thu chu zawm mai ṭha an tih thu sawiin JAC chuan, "Duty thei an ni ta lo a, kan duh dan hrethiam ve pha lo state dang motor liante chu an lo lut lo thei ta lo a, pawi kan ti hle. Hetiang thil a thlen tâkah chuan hmun danga kan duty pawh ṭulin kan hre ta lo a, tihtawp nghal ni se tiin kan rêl a, October 11, 2023 zing dar 7 aṭangin tihtawp a ni," an ti.

JACPR chuan, an hmalakna thláwptu mipui chungah an lawm thu an tarlang a; an duty loh hnuah hna thawktute'n hna an thawk hlei thei loa an awm a, kawngpui ṭha an nei thei ta lo a nih chuan pawi an tih hle tur thu leh, lirthei lian Mizoram mamawh phurtute an tlân leh hlei thei lo a nih pawhin an mawhphurhna a nih loh tur thu an tarlang bawk a, "Kawng ṭha hi kan duh ber a nih avangin hnathawktute'n ṭha tak leh chak zawka an thawh theih nan Kolasib DC leh SP-te hi theih­tawp chhuah turin kan ngen nghal e," an ti bawk.