Political party-te leh NGO-te'n vote chhiar hun sawn tura ECI ngen an rel

Central YMA chuan nimin khan CYMA Committee Room-ah Mizoram Assembly inthlanpui vote chhiar hun atana Pathianni ruat chungchang sawihona an huaihawt a, tlawmngai pawl leh political party hrang hrang aiawhte an tel. Vote chhiar hun sawn tura Election Commission of India ngen an rél.

Ṭhutkhawm hi CYMA president R Lalngheta'n a kaihruai a; CYMA hruaitute bakah, tlawmngai pawl aṭangin MUP, MHIP, MZP leh MSU aiawh te, political party aṭangin Aam Aadmi Party, BJP, Congress, MNF, ZPM leh ZNP aiawh mi pahnih ṭheuh an tel.

ECI-in Mizoram Assembly inthlan vote chhiar ní atan December 3, 2023 (Pathianni) a ruat chu Kristiante ni serh leh Pathian biakna ní a nih avangin a remchan loh thu an sawi a; Pathianni leh Inrinni tih loh ni dang ruat zawk tura ECI hnena ziaka thlen ni se, an ti.

Election Commission hnena lehkha thawn turah chuan tlawmngai pawl leh political party tin president ṭheuhin hming ziak se, an ti a; ngenna lehkha chu a copy Mizoram Chief Electoral Officer hnenah pek tel bakah, sawipui an rêl bawk.

NGO-te leh political party aiawhte chuan, an ngenna ECI-in tihhlawhtling lo a, Pathiannia vote chhiar a titlang dawn a nih chuan a ṭul anga hmalak dan tur ngaihtuah leh ni se, an ti.