Luia nungchate man khap a ni

Governor Dr Hari Babu Kambhampati chuan nimin khan Mizoram Fisheries Amendment Act, 2002 Section 5(1)(2) behchhanin Mizoramah luia nungcha leh sangha man khap a nih thu a puang. Khapna hian kumin October 10 aṭanga December 19 thleng a huam ang.

Governor chuan, luia nungcha leh sangha chi hrang hrangte an inthlah pun hun chhunga tihchhiat leh tihbuai a nih loh nan leh, him taka an inthlah pun theih nan Mizorama luiah sangha leh nungcha dangte man khap a nih thu a tarlang a, "Nghalim, nghadawl, nghavâng, nghavawk, nghahrah, léngphár, chakai, chengkawl, kaikuang leh a dangte man, tihhlum, an chenna leh nunphung tihbuaite khap tlat a ni," a ti.

Khapna thupek hian autonomous district council chhunga luite a huam lo a; khapna thupek bawhchhiate chu Mizoram Fisheries Act, 2002 Section 5(4) tlawhchhanin thla khat chhung lung-ina tàntir (thla thum thleng pawhsei theih) emaw, Rs 5,000 chawitir emaw, a pahnihin emawa hrem theih a ni.