Eirûk thubuaia thiam loh chang tawh High Court-in a chhuah zalên rih

Aizawl District Court-a Special Court (Prevention of Corruption Act)-in eiruk thubuaia thiam loh a chantir tawh, C Lalfakawma, PWD junior engineer leh CADC chief executive member hlui Kali Kumar Tongchongya te thiam loh chantirna leh hremna chu Gauhati High Court, Aizawl Bench chuan a titawp lailâwk (suspend) a, bail-a chhuah a phalsak.

Tarlan tawh angin, PWD JE C Lalfakawma, Khatla South hi special judge (PC Act) Dr HTC Lalrinchhana chuan September 4, 2023 khan thiam loh a chantir a, kum li chhung táng tur leh Rs 2,00,000 cháwi turin a hrem. Kali Kumar Tongchongya chu September 25, 2023 khan thiam loh chantirin, September 26, 2023 khan hremna tur a puang a, kum li táng tur leh Rs 4,00,000 chawi turin a hrem a ni.

Special Judge thutlukna hi C Lalfakawma te chuan Gauhati High Court, Aizawl Bench-ah an khing lêt a, Gauhati High Court Aizawl Bench judge Justice Marli Vankung chuan October 10, 2023 khan order tichhuakin, Special Court-in thiam loh a chantirna leh a hremna chu a suspend a, C Lalfakawma chu bail-a chhuah a phalsak bawk.

Chakma Autonomous District Council-a CEM hlui Kali Kumar Tongchongya pawhin Special Court thutlukna chu Gauhati High Court Aizawl Bench-ah a khing lêt a; Gauhati High Court Aizawl Bench judge Justice Nelson Sailo chuan October 6, 2023 khan thupek tichhuakin, KK Tongchangya chu Rs 50,000 dah kham a, bail-a a chhuah lailawk a phalsak.

Justice Nelson Sailo chuan, Special Court-in Kali Kumar Tongchongya thiam loh a chantir tawhna leh hrem a nih dan tura thutlukna a siam tawh chu High Court-in thutlukna dang a siam hma chuan tihtawp lailâwk (suspend) rih a nih thu a puang bawk.

Special Court (PC Act) judgement-a tarlan danin, Mizoram PWD deputy secretary H Thanga Zate-in May 20, 2020-ah Mizoram Lokayukta-ah thubuai a thehlut a; C Lalfakawma chu PWD Khawzawl Division-a JE hna a thawh laiin Rabung leh Aiduzawl inkar kawng laitu leh enkawl zuitu contractor Lalroenga hnen aṭangin dik lo taka Rs 17,00,000 laah leh sub-contractor Vanhmingthanga hnen aṭangin Rs 3,00,000 laah puh a ni.

C Lalfakawma chu PWD JE a nihna anga a thuneihna leh mawhphurhna hmangsual a, uchuak taka sum tam tak hmanga a duhsak zawngte dan loa sub-contract hna a thawhtira ngaih a ni a, Special Court (PC Act)-in IPC Section 409 leh PC Act Section 13(2) hnuaiah thiam loh a chantir a ni.

Kali Kumar Tongchongya lakah hian District Council & Minority Affairs Under Secretary chuan Anti Corruption Bureau-ah FIR a thehlut a, sum tam tak tichingpena puh a ni.

ACB-in an chhuinaah, NLCPR hnuaiah kum 2009-2013 chhung khan Longpuighat leh Kukurduleya inkar kawng siamna tur CADC-in cheng vbc. 11.29 a hmu a, chu'ng zinga cheng vbc. 1.79 chu tihchingpen a ni tih hmuh chhuah a ni. Sum tichingpen zinga vbc. 1.26 chu hmuh lêt a ni thung.