Kum 5 chhung chu electric bill kan tisang dawn lo - Lalduhoma

ZPM leader Lalduh-oma chuan nimin khan Khawrihnim community hall-a ZPM Dampa East Block Conference-ah thu sawiin, ZPM an sorkar chuan kawlphetha siam belh turin project pathum, kawlphetha megawatt 274 siam thei tur din turin hma an lâk nghal dawn thu leh, kum 5 chhung chu electric bill an tihsan dawn loh thu a sawi.

Lalduhoma chuan, kum 35 chhung state puitling nih hnuah pawh kawlphetha siam chhuah zat chu a tam ber lai pawhin megawatt 26 a nih thu leh kawlphetha lei nan cheng vaibelchhe tam tak sèn ṭhin a nih thu a sawi a, "ZPM chuan kawlphetha siam belh turin project pathum, MW 274 pe chhuak thei turin hma a la nghal dawn. Kum 5 chhungin electric bill kan tisang dawn lo a, mipui tan bill pek dan awlsam kan siam ang a, sorkarin electric bill a pek tlai vanga a chawi belh ṭhin pumpelh turin ruahmanna siam a ni dawn," a ti.

Inkalpawhna kawng ṭha zawk a awm theih nan hma an la dawn tih sawiin Duhoma chuan, "Contract leh supply hnate hralh chhâwn kan phal dawn lo a, ṭul bika sub-contract rawih a ngaih pawhin dan ang thlapin thil kan kalpui ang," a ti a; kum khata thawh theih tura beisei an siam ang a, contract hnate a tam thei ang ber open tender-in an tih dawn thu a sawi.

Lalduhoma chuan, Mizoram mipui 60% vel chu agriculture leh a kaihhnawih thila innghat an la nih thu sawiin, "ZPM chuan kut hnathawktute hmasawnna ngaih pawimawh hmasa berah a nei dawn a, a theih chin chinah kháwl hmangin phaizawl leilet siam a ni ang," a ti.

ZPM Leader chuan, a huho leh mimala ran vulh duh tan ruahmanna mumal tak an siam dawn thu sawiin, "Mimal ran vulh tawh sate a ṭul angin tanpui an ni dawn a, ran vulh tur reng reng inzirtirna leh inkaihhruaina mumal tak pek an ni ang a, hlawhtlin tum tak tak chu loan hmanga scheme ṭha tak ruahmansak an ni dawn," a ti a; sericulture leh horticulture lamah pawh ruahmanna an siam dawn thu a sawi.

Mizoram mipui náwlpui himna leh ralmuanna lamah te, rualbanlo, kum upa, naupang leh hmeichhia humhalh lamah hma an lâk dawn thu te, tar pension (old age pension) chu sorkar laipuiin a kalpui mek ang bakah Mizoram sorkarin thla tin Rs 1,000 a pek belh dawn thute Lalduhoma chuan a sawi bawk.

Inkhawmah hian Dampa biala ZPM candidate tur Vanlalsailova pawhin thu a sawi a ni.