Kut hnathawktute khai chhuah nan SEDP kan sem zel dawn - Tawnluia

MNF senior vice presi­dent Tawnluia chuan nimin khan an party pisa Mizo Hnam Rûnah thuthar thehdarhtute a kâwm a; MNF-in sorkarna an chang a nih chuan an flagship programme Socio Economic Development Programme (SEDP) an sem chhunzawm dawn thu a sawi.

Tawnluia chuan, SEDP chu a theih ang angin chhung tin (family oriented) thleng phâkin pek ṭan a ni tawh tih sawiin, "MNF sorkarin inthlan dawna a intiam ang ngeia hetiang a ti thei hi a lawmawm tak zet. Mi harsa zawk leh kut hnathawktute duhsakna lantirtu sorkar chungah MNF chuan lawmthu a sawi a ni. SEDP dawngtu zawng zawngte'n hlawh­tlin pui ngei se kan duh tak zet," a ti.

MNF Sr. Vice President sawi danin, SEDP first phase-ah chhungkaw 60,000 hnenah Rs 50,000 ṭheuh pek niin, cheng vbc. 300 sen a ni a; second phase-ah chhung­kaw 60,000 vêk hnenah Rs 25,000 ṭheuh pek niin, cheng vbc. 150 hman a ni. Third phase-ah chhungkaw 60,000 dang pek leh tum a ni a, a dawngtu turte thlan a nih mek laiin inthlan hun puan a ni a, an sem thei tawh lo.

Tawnluia chuan, "Sorkarna kan chang leh a nih chuan SEDP pek zui zel a ni dawn a, chhung­kaw khatin cheng nuai 3 an dawn kim hma chu pek chhunzawm a ni ang a, project azirin nuai 3 chuang pawh an dawng thei dawn a ni," a ti.

SEDP sum sem atan cheng vbc. 450 hman a ni tawh tih sawiin Tawnluia chuan, "Sorkar hna vuan ve lo mipui náwlpui harsa zawkte ban phakah Mizoram budget hnuh hniam a ni hi a lawmawm a, Mizoram budget mipui hnen thleng pha a nihzia SEDP hian a tilang. Mipui ban phak sorkar kan neihzia pawh a tichiang hle," a ti a, sorkar aṭanga thlabi hlawh nei lo tan SEDP chu malsawmna niin a sawi.

Tawnluia chuan, an sorkar ṭan tirh lamah SEDP chu pilot project atan chhungkaw 2,000 chuang hnenah pek a nih tawh thu a sawi a, "Pilot project-a SEDP ṭanpuina dawngte'n Rs 3,00,000 chuangte an dawng. Hripuiin min tihbuai avangin eng emaw chen family oriented SEDP a khaihlak a ni," a ti.

MNF Senior Vice President chuan, SEDP pekah tih fuh loh deuh a awm palh thei tih sawiin, "Dawn mamawh ngawih ngawih, la dawng lo emaw, dawng tur thlan tawh, list-a tel lo palh emaw pawh awm theih a ni," a ti a; kimchang leh changtlung zawka kalpui zel tum a nih thu a sawi.

MNF sorkarin SEDP hmangin kut hnathawktute leh harsa zawkte lei rem rahtira khai chhuah an tum nghet tlat nia sawiin Tawnluia chuan, sum hmuh tur Covid vangin vbc. 3,000 dáwn hmuh a nih loh bakah harsatna hrang hrang an hmachhawn avangin harsatna an tawh thu a sawi a; SEDP sem chhunzawm a nih theih nan MNF vote tling leh turin Mizoram mipui a sáwm.

Zawhna chhangin Tawnluia chuan, SEDP chu mipui rilru hruai kâwi tumna leh vote zawnna a nih loh thu sawiin, "Kut hnathawktute khaichhuahna atan sorkarna kan chang leh a nih chuan kan kalpui zel ang. Thingtlang mipuite rilru pawh a tihlimin ka hria. Sorkarna kan siam hma aṭanga mipui intodelhna atana kan duan tawh a ni," a ti a, mipui pawhin ṭha an ti hlea a hriat thu a sawi a ni.