Pawl 12-te'n vote chhiar hun sawn turin ECI an ngen

Mizorama tlawmngai pawl leh political party hrang hrangte chuan Central YMA bultumin nimin khan Election Commission of India (ECI) hnenah lehkha an thawn a, Mizoram inthlanpui vote chhiar hun sawn turin an ngen.

ECI-a ngenna lehkha inṭâwm an thehluhah hian CYMA bakah, MUP, MHIP, MZP leh MSU hmunpui ṭheuha an president te, political party pasarih - Aam Aadmi Party, BJP, MNF, MPCC, ZPM, Peoples' Conference leh ZNP president-te'n hming an ziak a ni. Lehkha chu ECI-ah an thawn bakah, a copy Mizoram Chief Electoral Officer hnenah an pe bawk.

NGO leh political party hrang hrangte hian vote chhiar hun atana December 3, 2023 (Pathian­ni) ruat chung­chang October 11, Nilaini khan an lo sawiho tawh a, sawn tura ECI ngen an lo remti tláng tawh. Vote chhiar hun chu Pathianni leh Inrinni ni lo, ni dang ruat turin ECI an ngen a ni.