KHAWTHLIR

Silai ken khap

Aizawl, Champhai leh Serchhip district magistrate-te chuan nimin khan thupek chhuahin, an district ṭheuhah silai ken chhuah khap a nih thu an puang. Thupek bawhchhiate chu IPC Section 188 hmanga hrem an ni a; thupek hian sorkarin phalna a pekte leh venhimna hna thawktute a huam lo.

Thisen pe

PYD (NEI), Bairabi bial chuan nimin khan Bairabi Venghlun sunday school hall-ah Kolasib District Hospital tan thisen unit 37 an pe a, petute mipa 23 leh hmeichhia 14 an ni.

CYMA-in hlân

YMA Inkhawmpui Lian senso atana nikuma YMA Rorel Inkhawmin YMA member tin Rs 5 zel thawh an rel angin member-te'n pawisa an thawh a, Central YMA office-ah Rs 13,87,618 a lut tawh. Pawisa lut tawh zinga Rs 10,00,000 chu Inkhawmpui Lian thlengtu Biate branch YMA President hnenah nimin khan an hlan a, Rs 3,87,618 chu CYMA-in Inkhawmpui Lian puala a senso atan an dah thung.

Khawlphetha pe thei dawn lo

Power & Electricity department chuan vawiin hian 33KV indoor sub-station leh Durtlang 33KV sub-station line-ah hna an thawk dawn a, hei vang hian chawhma dar 11 aṭanga chawhnu dar 2 inkarah Electric Veng, Chhinga Veng, Lower Zarkawt, Bara Bazar, Zarkawt, Dawrpui, Chanmari, Tuikual South, Treasury Square, Saron Veng, Tuithiang, Bethlehem Veng, Venghlui, Armed Veng, Aizawl Venglai, Ramthar North, Durtlang North, Leitan, Sihphir Venghlun, Selesih, Nausel-ah te kawlphetha a awm dawn lo.

Inthlan tur sawiho

Kolasib district election officer John LT Sanga hoin nimin khan DC conference dall-ah inthlan kaihhnawih sorkar hotute leh political party hruaitute'n MLA inthlanpui neih tur an sawiho a; uluk taka MCC chhiara zâwm ṭheuh tur leh sum hman chungchangah felfai taka kal turin party-te chah an ni.

Engineer kai sang

PWD-a superintending engineer pathum chu chief engineer-ah an kai sang. David Sapzova chu Chief Engineer (Planning), Lalzarliana chu Chief Engineer (Roads) leh Hrangthanga Zote chu Chief Engineer (Buildings & other department) an ni dawn a ni.

Jubilee lawm

Ch. Chhunga High School, Luangmual chuan nimin khan golden jubilee an lawm a, School Education secretary Dr Lalzirmawia Chhangte-in hmanpuiin, golden jubilee lungphun a hawn bakah souvenir a tlangzarh. Ch Chhunga H/S hi February 14, 1973 khan din niin, kum 1991-ah sorkar sikulah dah a ni a, mi 1,229-in HSLC an pass chhuah tawh. Kum 2022-ah Samagra Shiksha aṭangin higher secondary school-ah hlan kai a ni a, zirlai 108 leh zirtirtu 21 an awm mek a ni.