Manipur-a Zo fate zinga mi 60,000 vêl chenna mumal nei loin an awm

Manipur Zo hnam péng hrang hrang intélkhawm, Zo United hruaitute chuan nimin khan Aizawl Press Club-ah thuthar thehdarhtute an kâwm a; Manipur Zo fate zinga mi 60,000 vel chênna mumal nei thei loa an awm mek thu an sawi.

Zo United convener Albert L Renthlei chuan, Manipur-ah Meitei hoin an duh lo chung buainaah an hnûk lut tih a sawi a, "May 3, 2023 aṭang khan kan zuam loh, kan duh loh, kan tum hauh loh kawngah kan chênpui Meitei-te'n min nawrin min hnûk lut a, a tua mah min thliar hrang loin, Kuki Zo tiin min suat mang vek tumin rálah min puang a ni," a ti.

Nimin thleng khan Manipura Zo hnahthlak hrang hrang chenna khua 203 hâl ral a ni tawh tih sawiin Albert L Renthlei chuan, "In 8,166 leh biak-in 266 min hâl sak tawh a, kohhran office leh quarters 94 min tihchhiatsak tawh. Mi 142 an thi tawh a, mi 60,000 chuang chenna mumal nei thei loa siamin kan awm mek," a ti a; relief camp 168-ah an awm mek thu leh camp-a awm mi 41 chu natna vangin an thih tawh thu a sawi.

Zo United hruaitute chuan, Mizoram sorkar, kohhran leh pawl hrang hrang, chanchinbumi leh media mite leh Mizoram mipui chungah an lawm thu an sawi a, "Thinlung taka min lainat leh khawngaihin, hmangaihnaa min lo kuangkuah hi ropui leh lawmawm kan titawp thei lo. Pathian leh in zaa chungah lawmthu kan sawi nawn a, kan sawi báng lo ang," an ti.