MNF hotute phaiah an NDA a, Mizoramah erawh an kimki leh si - Lalrinliana Sailo

Assembly speaker leh MLA aṭanga October 11, 2023-a báng ta Lalrinliana Sailo chu nimin tlai khan Nagaland deputy chief minister Yanthungo Patton-a'n BJP-ah a lawm lut. Rinliana Sailo chuan, MNF hotute chu phai lamah an NDA em em a, Mizoramah erawh an kimki leh si niin a sawi.

Lawm luh inkhawm Mizoram BJP pisaa buatsaihah Lalrinliana Sailo chuan, "Kan hriat angin MNF leh BJP-te NDA-ah kan thawkho a, kan hotute phaiah an NDA em em a, Mizoramah erawh an kimki leh si. Kei chuan nihna ang anga lang turin BJP ka rawn zawm a ni," a ti.

Lalrinliana Sailo chuan, Mizoram hmangaihna vanga BJP zawm a nih thu sawiin, "Mahni lam ka inngaihtuah lo. BJP hi centre-ah a lo berah kum 20 chu an la sorkar dawn. Hmarchhak state zawng zawngah BJP kaihhruai sorkar a piang vek tawh a, hma an sawn em em hlawm a ni," a ti a, Mizoramah hmasawnna a thlen ve a duh thu a sawi.

Mizoramah a malin BJP a sorkar dawn lo tih a chian thu sawiin Lalrinliana chuan, "Mahse, BJP MLA tel loin tu mahin sorkarna an siam dawn lo. BJP hian MLA paruk aṭanga pakua kan neiin ka ring," a ti.

Lalrinliana Sailo chuan, Mizoramah Congress party din a nih tirhin, vai páwl tia intensiakna a awm thu sawiin, "Hun a kal a, a hnuah chuan vai pawl min ti maw, vai buhfai ei ṭheuh ṭheuh tih hlate a chhuak a, tun hun hi kan thleng a ni," a ti a; BJP pawh nakinah chuan mipuiin an hmuh dan an la thlâk ngei a rin thu a sawi.