Sakhaw zalenna neih theihna turin INC leh a thawhpuite vote turin sáwm

Pawl pathum - Congress party, PC party leh Zoram Nationalist Party (ZNP)-te intèlkhawmna, Mizoram Secular Alliance (MSA) hruaitute chuan nimin khan Aizawl Press Club-ah thuthar thehdarhtute an kâwm a, "Sakhaw zalenna kan neih theihna atan Congress leh a thawhpuite i vote tling ang u," an ti.

MSA convener John Siamkunga chuan, India rama sakhaw zalenna tihchhiat meka a awm bakah, sakhaw zalenna paih tuma hmalakna a awm meka an hriat avangin, do turin an thawkho tih sawiin, "MNF leh ZPM pawh thawhhopuiah kan sáwm a, mahse, vawiin thlengin chhànna kan hmu lo," a ti a; thu dik lo thehdarhin ṭan an khawh ta em ni aw a tih theih hial zawk niin a sawi.

John Siamkunga chuan, MNF chu NDA member nghet tak ni sa an nih thu sawiin, "NEDA member ruh tak an ni bawk. Parliament-ah pawh rorel lai BJP lamah an ṭhu. Sakhaw zalenna humhim nana thawhpuia kan sàwmna min chháng ta lo a ni," a ti.

ZPM chu MSA-a tel tura an beisei thu sawiin John Siamkunga chuan, "Kan beisei tehlul nen min be ta lo. ZPM Leader phei chuan nasa takin min bei zawk a ni. BJP thawhpui loh an hlau hle zawk niin a ngaih theih. Kristianna humhim nan theihtawp an chhuah duh kan rin tehlul nen, a ni ta si lo," a ti a, inthlan awm tur chu sakhaw zalenna duhtu leh Hindu lal ram din duhtute inbeihna a ni dawn niin a sawi.

MSA Convener chuan, BJP-in Parliament-ah MP a ngah hle tih sawiin, "Sakhaw zalenna hi an paih thei reng tawh. Mahse, anmahni ṭantu state sorkar 11 chauh an la nei a, state sorkar pathum an la mamawh belh. Kumin inthlanah hian neih tlin an tum a, an neih theih chuan dan hmangin kan sakhaw zalenna hi an paih tawh ang. Sakhaw zalenna kan neih chhunzawm zel nan Congress leh a thawhpuite i vote tling hram ang u," a ti.