MZP-in hnam dang pasal nei candidate-a dah tum pawi an ti

MZP hruaitute nimina an pisapuia ṭhukhawm chuan, Mizoram Assembly inthlanpui awm turah candidate atana Mizo hmeichhia, hnam dang pasal nei dah tum an awm chu pawi an tih thu leh, a tawp thlenga dodal an duh thu an tarlang.

MZP chuan thuchhuah siamin, "Mizoram rorelna sang ber Assembly House-a ṭhu tur MLA inthlanna lo awm turah Mizo hmeichhia, hnam dang pasal nei candidate tura dah tumna awm hi pawi kan ti. MZP-in political party tinte hnam dang pasal neite candidate-a dah lo tura vawi tam a ngen tawh chungin awmzia a nei tâwk loin kan hria a, Mizoram leh hnam a him zel theih nan a tàwp thlengin hmalak zel ni se kan ti," an ti.

Mizorama Mizo hming hawha hnam dang sundawng tam tak an awm leh an huangtau chho zel chu pawi an tih thu sawiin MZP chuan, "ILP kalpui danah a sponsor-tute'n dan an zâwm tâwk lo leh hnam dang thlavâng hauhtu an pung zel hi kan ram leh hnam tan a him loin kan hria," an ti a; Mizo hming hawha hnam dang sumdawngte dapchhuak turin a ṭul anga hmalak an tum thu an tarlang.

MZP ṭhutkhawmah hian kum 2023-24 chhunga MZP Gen.Hqrs.-a secretary tur mi pakua an ruat a ni.