Sumah kan harsa - Zoramthanga, Sorkarin a hnathawkte hlawh a pûk ṭhen dawn

Chief Minister hian Inrinni khan CMO conference hall-ah thuthar thehdarhtute a kâwm a; Covid-19 dona atan CM Relief Fund-a sum thawh an awm zel chu lawmawm a tih thu sawiin, "CM Relief Fund-a sum lut hian mamawh hmun sawma ṭhena hmun khat (10%) vel chauh a phuhru a ni. Kan sum dinhmun a harsat avangin Covid-19 atan rawn thawh zel se kan lawm ngawt ang. A lut zat leh hman dan hmuh theih vek a ni," a ti a; Covid-19 avangin state fund cheng vaibelchhe eng emaw zat hman a nih tawh thu a sawi.

'Pu Zorama'n pawisa a tam thu a sawi ṭhin' ti an awm thu sawiin Zoramthanga chuan, "Covid-19 hma kha chuan a tam ngei a, India sorkar pawhin a ngah. Covid-19 hnuah chuan a tam tawh lo a, kan hmuh tur zat pawh a hriat tawh loh. Sumdawnna leh thil tih a chàwl ṭhup a, India sorkar leh khawvel pawh a buai vek. April-ah ṭhenkhatah chuan kan pawisa dawn tur a chanvete kan hmu pha lo a, a chanve kan hmuhnaah pawh kan hmuh tur ang kan hmu pha lo hle a ni," a ti.

'Sum dinhmun dik tak hre lo báng rawh se' tih a finthlak ber lo nia sawiin CM Zorama chuan, "Pathian chauhin a hria a ni. RBI aṭang chuan ni tin kan sum neih zat min hrilh ṭhin ngei, mahse, a danglam reng a, sum dinhmun sawina atan rin chi a ni lo. Kan sum dinhmun hi rin thu bak sawi tur a awm lo. Session koha budget allocation siam ṭhat rawtte an awm a, sum hmuh dan tur a hriat miau loh avangin awmzia a awm lo," a ti a; Covid-19 avangin Parliament leh state dang pawhin session an ko lo tih a sawi.

Chief Minister chuan, sum hmuh tur ang hmuh a nih dawn loh avangin inrenchemna lamah ṭan an lâk thu sawiin, "Kan pawisa fai dinhmun a chhiat avang leh central aṭanga sum kan hmuh ṭhat loh chuan ei tur leina kan neih loh a hlauhawm avangin, sorkar hnathawk hlawh laksak ni loin, batsak rih Cabinet chuan a rél. Hlawh bat zat percentage tur chu Finance department-in an ruahman ang. Group D leh a hniam lam deuhte chu ngaihnathiam tura tih a ni. Hlawh bat hi boruak ṭhat hunah rulh a ni ang," a ti.

Vanglaini palai zawhna CM-in a chhan danin, Covid-19 avangin Ways and Means hmanga sum pûk a la ngai lo a, mahse, central aṭanga sum hmuh a tlem zel chuan pûk a ngaih hun a awm a rinawm. Ways & Means hmanga sum pûk a ngaih lohna turin theihtawp chhuah zel an tum a ni.

CM Zoramthanga chuan, Covid-19 vangin ngaihtuahna leh suang­-tuahna piah lamah khaw­vel, India leh Mizoram a buai thu sawiin, "Hripui­in min tuam lohna turin hriselna a pawimawh a, chumi dawtah chuan ei tur a ni. Ei tur thiarna kawng a pin a hlauhawm a, chumi a thlen loh nan hma kan la a ni," a ti a; hmasawnna dang chu pawimawh mah se, hriselna, ei tur leh ei tur thiarna kawngte ngaih pawimawh hmasak a ṭul thu a sawi.

Chief Minister chuan, state páwna tangkhang, rêl chuan man nei lote chu state sorkarin a tumsak dawn nia sawiin, "Tangkhangte hawna tur­ah CM-te kan inbe reng a, anni'n kan state mite hawna tur an ngaihtuah a, keini pawhin kan rama tangkhangte hawna tur kan ngaihtuah. Ṭhat leh ṭhatin kan inláwm tlang a, a lawmawm," a ti.

Lengpui Airport a tlawh ṭhin chungchangah CM Zorama chuan, "Tute emaw ka mawhpuhna ni loin, kan sorkar tirh khan kan airport hi an khâr hman ṭêp a, min rawn vau reng a ni. A chhan chu runway a chhiat vang te, a hungna a chhiat vang te, parking zîm vangte leh thlawhna ṭum tur guide-tu hman tlak loh ṭan vangte a ni. Covid-19 vanga passenger awm loh lai kan chuh a, siamṭhat hna kan thawk a ni," a ti a; hna zualpui an zawh tawh thu a sawi.

Zoramthanga chuan, 'Lengpui Airport-ah CM a kal zing' tih chu a dik thu sawiin, "Ka department chan GAD hnuai a ni a, vawi tam la kal a ngai. Pawisa sanction nena in connect vek a ni a, ka la kal leh tlut tlut a la ngai," a ti.

Thuthar thehdarhtute a kawmnaah hian Chief Minister hi Home mi­nister Lalchamliana, IPR minister Lalruatkima leh additional chief secretary JC Ramthanga te'n an 

ṭawiawm a ni.

•    Sum dinhmun a harsat avangin Covid-19 atan rawn thawh zel se kan lawm ngawt ang

•    Covid-19 dona atan state sum vaibelchhe eng emaw zat kan hmang

•    Pawisa a tam thu ka sawi ṭhin kha a dik a, Covid-19 avangin a tam tawh lo

•    April-ah kan pawisa dawn tur chanve kan dawn phâk lohnate a awm

•    Kan sum dinhmun Pathian chauhin a hria a, rin thu bak a sawi theih loh

•    Hlawh bat turah group-D leh a hniam lamte ngaihnathiam tur a ni

•    Tangkhang hawna tur nei lote state sorkarin a tumsak dawn

•    Lengpui Airport chei ṭhat mek a ni a, vawi tam ka kal a la ngai