MZP-in hnam dang pasal nei an tlin loh nan hma an la dawn

Mizo Zirlai Pawl (MZP) hruaitute chuan, Mizo hmeichhia, hnam dang pasal neite MLA candidate an nih chuan thlan tlin an nih loh nan hma an la dawn tih an puang.

MZP hruaitu tharte'n nimin khan MZP pisapuiah thuthar thehdarhtute kâwmin, chawchhûn an kîlpui a; MZP president H Lalthianghlima chuan, kumin MLA inthlanpuiah Mizo hmeichhia, hnam dang pasal neite candidate atana hmang lo turin political party tin an ngen tawh tih a sawi.

H Lalthianghlima chuan, "Mizo hmeichhia, hnam dang pasal neite hi Mizorama an awm hian an hnawk kan ti hran lo, amaherawhchu, kan rorelna sang bera an awm tur erawh kan ngai ngam lo a, MZP thil tum zinga mi a nih tel avangin hetiang hi kan ti lo thei lo. Party-te'n candidate atana an dah tlang a nih chuan an tlâk ngei theih nan hma kan la dawn a, hmalak dan tur chu Executive Committee-in a ngaihtuah zel ang," a ti.

MZP-in a lungkham leh ngaih pawimawh ber chu ram leh hnam himna tur a nih thu sawiin Lalthianghlima chuan, "MZP thil tum 11 zingah 'Inchîm ral theihna laka Mizo hnam humhalh' tih leh 'Mizoram leh hnam tluchhe tur vên tlat' tih a tel. Kan ngenna zahin party ṭhenkhat chuan hetianga candidate beiseite an thlâk phah hial a, lawmawm kan ti hle," a ti a; tun hnaiah MLA candidate turin hnam dang pasal nei ngeia hriatte hming a ri ring tih an hriat thu leh, party tinte hnenah candidate atan hnam dang pasal nei dah lo tura ngenna an thawn nawn thu a sawi.

MZP President chuan, Law & Judicial department-in Mizo hnam dan 'The Mizo Customary Law' a tihchhuah bung 3:74-ah, 'Mizo hmeichhiain hnam dang pasal a neih chuan hnam dang chhungkuaah a luta ngaih a ni' tih a nih thu a sawi a, "MZP chuan Mizo hmeichhia, hnam dang neite chu hnam dang chhungkuaah a ngai nghet tlat a, Mizo mipui aiawha ram rorelna sang bera ṭhu turin a pawm thei lo a ni," a ti.