Mizoram, Assam leh Tripura-a District paruk hotute an inkâwm

Mizorama district pahnih - Kolasib leh Mamit, Assam-a district pathum - Cachar, Hailakandi leh Karimganj leh, Tripura-a North Tripura district-a DC leh SP-te chu nimin khan video conference hmangin an inkâwm a; Mizoram MLA inthlanpui awm tura thawhho dan tur an sawiho.

Kolasib bawrhsap John LT Sanga chuan, Mizoram, Assam leh Tripura chu state inrî, kawng hrang hranga inmamawh tawn an nih thu leh ramri hnaih district-a DC leh SP-te'n thawhhona ṭha tak neia thil an sawiho ṭhin a pawimawh thu a sawi a, "Dan leh thupek kenkawh kawngah te, ruihhlo dona leh ei leh bar chungchangahte inpawhna leh inhriatthiamna a thlen nasa a, a ṭangkai hle a ni," a ti.

John LT Sanga chuan, Mizoramah November 7, 2023-ah inthlanpui a awm dawn thu sawiin, inthlan vuakvêtah ramri venah te, a ṭha lo zawnga inthlan nghawng thei thil thleng tur dan leh vênahte state ṭhenawma Mizoramin a rî district-te thawhpuina a mamawh thu a sawi a; theihtawpa Mizoram thawhpui turin a ngen.

Mamit bawrhsap VL Remliana chuan, state ṭhenawma ramri district-te chu ramri kâna dan loa Mizorama bungraw tawlh luh, inthlan kaihhnawiha sum tawlh luh awm thei leh dan loa thil titute chêt velna ven kawngah theihtawp chhuaha vênpui turin a ngen a ni.

Kolasib SP Lalrinawma Traite chuan, ramri district-a SP-te chu Mizoram inthlan vuakvêta dan leh thupek kenkawhna, ramri kâna ruihhlo leh dan loa thil tih awm thei chi hrang hrang vêng turin a ngen a; Mamit SP Lalthangpuii Pulamte leh Vairengte SDO (Civil) Lalremruata Sailo te pawhin inthlanna felfai leh muanawm a awm theih nan ṭhenawm state district-te thawhpuina an mamawh thu an sawi.

Cachar, Hailakandi, Karimganj leh North Tripura district-a DC leh SP-te pawhin Mizoram inthlanpui awm turah an theihna apiangah ṭanpui an inhuam thu an sawi bawk.