Zoramthanga'n ngaihdam a dil

MNF president Zoramthanga chuan October 12, Ningani khan Saikuti Hall, Lungleia MNF Sub-Headquarters, Lunglei Special Con­ference-ah thu sawiin, ramin harsatna a tawh vanga mipui beisei ang an phâk lohnaah mipui hriatthiamna leh ngaihdam a dil.

CM Zoramthanga chuan, Mizoramin har­sat­na naménlo a tawh avangin sorkar sum din­hmunin a tawrh nasat thu a sawi a, "Dam khaw­chhuahna tura beih a ngaih avangin sorkarin a tum ang taka hna a thawh theih loh karah development hna thawh erawh kan ṭhulh lo. Ramin harsatna a tawh avanga mipui beisei ang an phâk lohnaah mipui hriatthiamna kan dil a, ngaihdam dìl kan ngaihnaah min lo ngai­dam ang che u," a ti.

MNF President chuan, Lunglei kawng siam nan SASCI leh department sum dah tawh aṭanga thawh ṭan ni mah se, fûr a rei avangin tum angin hna thawh a harsat thu sawiin, mipui hriatthiamna a dil a; khua a hul hunah chak taka hna thawh a nih tur thu a sawi.

Covid-19 léng avanga sum leh paia harsatna an tawh thu sawiin Zoramthanga chuan, "Covid vanga Mizoramin central aṭanga sum a hmuh tur ang a hmuh tâk loh leh Mizoram state-in chhiah leh thil danga a hmuh loh, a hloh zawng zawng belh khawm chu cheng vbc. 3,500 - 4,000 vel a ni ang. Ṭhenawm ram buai vanga kan unaute Mizorama rawn ráltlân mi 50,000 chuang chu budget-a awm lo sorkar suma enkawl mek an ni," a ti.

Zoramthanga chuan, inthlanpui awm turah an khingpui party-te'n MLA seat lak tur an neih tam a rin loh thu leh MNF chu Pathianin a sorkartir leh ngei a rin thu a sawi a, "MNF hi a sorkar leh ngei ṭul kan ti a, kan theihtawpin kan bei a, keini aia kan sorkar ngei ngei a pawimawh ti zawk an awm a ni," a ti a; MNF chu hnam party, Zo hnahthlak zawng zawngte tana ding leh sorkar laipui thupek pawh pawisalo ngam niin a sawi.

MNF President chuan inthlanpui awm tura MNF candidate-te chu lungsi taka an thlante an nih thu leh an candidate-te boruak a kàn zel thu a sawi a; MNF candidate-te vote vek turin Mizoram mipui a sáwm.

Inkhawmah hian Lok Sabha MP C Lalrosanga pawhin thu a sawi a; Zoramthanga'n voter 1,868 MNF-ah a lawm lut niin MNF thuchhuah chuan a tarlang.