Sex video thehdarhtu mi 3 man an ni

Social media kaltlanga mipat hmeichhiatna hmang lai thlalak (video) siama thehdarhtua puh mi pathum chu Mizoram police-te'n an man a, court-ah hruai an nih tawh thu Police thuchhuah chuan a tarlang.

Police thuchhuah tarlan danin, mipat hmeichhiatna kaihhnawih video siam leh thehdarh chungchangah Cyber Crime Police Station chuan Information Technology Act, 2000 Section 67A tlawhchhanin September 7, 2023 khan thubuai an ziak lut a; video siamtu leh social media-a dahtu ni ngeia hriat mi pahnih an man a, September 23 khan court-ah an hruai a ni.

Police PR chuan, Instagram live-a mipat hmeichhiatna hmang lai dah chungchangah Cyber Crime PS chuan September 13, 2023 khan thubuai an ziak lut bawk tih an tarlang a, "Chhui zuina aṭangin he Instagram account neitu leh live-a video post-tu ni bawk hriat chhuah a ni a, ama duh thu ngeia live video siam a ni tih hriat chhuah niin, damdawi a ruih vanga ti a nih thu a sawi tel," an ti a, September 26 khan court-ah hruai a nih thu a tarlang.

Mizoram Police chuan, sex video leh thlalak dukdaklo chi rêng rêng social media-a thawn darh lo turin mipui an chah a, "Tun hnaiah social media-ah sex video a darh nasa a, heng thlalak leh video ṭha lo hi mipui náwlpui hmuh leh hriat atan a him lo. Hetiang thil titute hi IT Act Section 67A hmangin kum 5 tàn thlenga hrem theih a ni," an ti.