Sorkar chungah MTA an lawm

Mizoram Taxi Association (MTA) hruaitute chuan nimin khan Aizawl Press Club-ah thuthar thehdarhtute an kâwm a; Mizoram sorkarin taxi permit pakhatah taxi vawi hnih thlâk (replacement) a phalsak chu lawmawm an tih thu an tarlang.

MTA president R Lalawmpuia chuan, "Kan eizawnna min siam tharsaktu sorkar kan nei hi kan chhuangin duhsakna sang ber kan hlan a, kan mamawh leh ṭul dang min tihsaktu apiangte chu theihtawpa nasain kan chawimawi zel dawn. Mizoram mipuiin sorkarna kan siamtir apiangte chu engtik lai pawhin ṭha takin kan ram leh hnam tan kan thawhpui zel dawn a ni," a ti.

Tunlaia taxi driver-te leh mipui buaina tam ber chu taxi-a thil theihnghilh a nih thu sawiin MTA hruaitute chuan, "MTA la zawm lo taxi 200 vel an awmin kan hria. Taxi-ah MTA member hriat hran theihna sticker kan bel vek a, sticker inbel taxi-a thil theihnghilhte chu rang takin kan zawn chhuahpui thei," an ti a; taxi number chhinchhiah ṭhin tur leh thil theihnghilh an neih chuan MTA office-ah thlen ṭhin turin mipui an chah.

Taxi thlâk phal chin tihpun a nih vangin mi dang eizawnna tur an dâl loh thu te, taxi-a eizawng duh tan lei chhâwn tur a awm ṭhin thu leh, taxi an lei chhàwn aṭanga eizawnna nei chho an nih tlangpui thu an sawi a; sorkarin taxi permit hralh chhâwn a phal loh chungchanga zawhna chhangin MTA hruaitute chuan, "Kan hralh lo a, kan inrochun a ni," an ti a, inrochun eng emaw zat an awm thu an sawi a ni.