World Hospice & Palliative Care Day hmang

Vawiin October 14 hi World Hospice & Palliative Care Day a ni a, Hospital & Medical Education (HME) conference hall-ah nimin khan hman a ni. Kuminah September thlengin palliative damlo mi 2,198 enkawl a ni tawh.

Palliative Care consultant Dr Lalthanmawii Khalthang tarlan danin, kum 2022-23 chhungin palliative damlo mi 2,935 enkawl niin, an zinga mi 965 chu admit an ni a; palliative damlo thar mi 964 an awm. Kum 2023 bikah January-September thlengin palliative damlo mi 2,198 enkawl niin, mi 1,192 chu admit an ni a, mi 435 chu damlo enkawl thar an ni.

World Hospice & Palliative Care Day hmanna hi HME director Dr Lalmalsawmi Sailo-in a kaihruai a, Health principal director Dr Vanlalsawma khuallian a ni. Dr Vanlalsawma chuan, "Palliative care hmanga enkawlna dawngtute'n hmangaihtu hmel an hria a, an harsatna ngaihthlaksak a, hnemtu nih hi kan mawhphurhna a ni. Thawktute'n eizawnna ang chauha ngai lo a, ngilneihna lantir tur kan nihna hre renga palliative damlote enkawl hi kan bat a ni," a ti.

Mizoram State Cancer Institute-a radiation oncologist Dr Lalhlupuii'n Mizorama palliative care kalpui dan a sawi a, damlo chhungte rilru leh taksa damna atan vantlang mipui, pawl leh kohhran hruaitute'n bengvar an chhuah thar leh a ṭul thu a sawi.

Palliative Care-in a tum ber chu, cancer leh natna benvawn dang vanga damlo, dinhmun hniam leh thih hlauhawma ding mekte'n na lutuk tuar lo leh rilru hahdam leh zângkhai taka hun an hman theihna tura enkawl a ni a; National Programme for Palliative Care hmalaknain October 2016 khan Mizoramah kalpui ṭan a ni.