Inthlan felfai taka neih dan tur sawiho
Mizoram Leghislative Assembly inthlanpui awm tur puala din Aizawl District Level Standing Committee chu nimin khan chairman Nazuk Kumar, bawrhsap hoin DC conference hall-ah a vawi khatna atan an ṭhukhawm a; Mizoram inthlanpui tluang tak leh felfai taka neih theih dan tur an sawiho.
Ṭhutkhawmah hian Election official te, sorkar department aiawh te, political party aiawh te, Mizoram Journalist Association, Mizoram People Forum leh tlawmngai pawl hrang hrang aiawhte an tel.
Nazuk Kumar chuan, MLA inthlan tur chu tluang taka a kal theih nan Committee member-te chu an mawhphurhnate a sawipui a; inthlan vuakvêtah kawng hrang hranga dan leh thupek bawhchhiatna leh buaina lian a thlen loh nan theihtawp chhuah ṭheuh turin a ngen.
Inthlan tura Aizawl district returning officer ni bawk DC chuan, boruak ṭha tak hnuaiah mipui tam thei ang berin vote an thlak theih nan sorkar department-te chu an ruahmanna siam dan turte hrilhin, an mawhphurhnate ṭha taka hlen turin a chah a; vantlang hmun pawimawha political party banner, poster leh flag tàrte chu la thla turin political party aiawhte a hriattir.
Bawrhsap chuan, polling station tin leh Election kaihhnawih hmun pawimawh tinah hnianghnâr taka tui pe tur leh kawlphetha ṭha taka pe turin PHE leh Power & Electricity department aiawhte a chah a; Excise & Narcotics department chu ruihhlo chungchangah chak taka hma la tur leh, a bik takin Rangvamual lam vil ngun turin a chah.
IPR department leh MJA-te chu inthlan kaihhnawih thilte chak leh ṭha taka puangzar tur te, mipui hriat tur pawimawh a hun taka hriattir turtein a chah a; Health department chu polling station tinah health worker duty tir tur leh, Social Welfare department chu rualbanlote'n vote an thlak vek theih nan hma la turin a chah bawk.
Mizorama inthlanna felfai tak neih a ni ṭhin chu mipuiin dan leh thupek an ngaih pawimawhna vang leh MPF hmalakna vang a nih thu sawiin Nazuk Kumar chuan, "MPF puihnain inthlan tluang taka kan neih leh ngei ka beisei," a ti a; tlawmngai pawl dangte pawh inthlanna muanawm leh thianghlim a awm theih nan theihtawp chhuah turin a ngen.