BJP dàn siam ṭha lo sût a nih theih nan Congress-in hma kan la dawn - Thanzara

Mizoram Pradesh Congress Committee (MPCC) senior vice president Lal Thanzara chuan, BJP leh an thawhpuite dàn siam ṭha lote sût a nih ngei theih nan Congress party-in hma an lâk zel dawn thu leh Congress party chu an tih tura an intiamte tipuitling ṭhin an nih thu a sawi.

Lal Thanzara hian nimin khan Congress Bhavan-a political session-ah thu sawiin, "Mizoram leh India ram tana BJP leh a thawhpuite dan siam ṭha lo tak tak chhu chata sût a nih leh ngei theih nan Congress party chuan hma a la zel dawn. Ram mipui himna leh Kristiante'n zalen taka India rama Pathian rawng kan bàwl leh theih hi kan duhthusam a ni," a ti.

Ṭang puihna hmangin ṭang tak takte an chawi kâng dawn nia sawiin Thanzara chuan, "Congress party chuan kan ti ang kan tih chu kan ti ngei ṭhin. Enchhin kan nih tawhnaah kan thutiama ding tlat ṭhin kan nih avangin Mizoram mipuite'n Congress party hi min enchhin leh mai rawh u," a ti a; Pathian chakna ringin an insiam ṭha tawh niin a sawi.

Lal Thanzara chuan, Mizorama sorkarna siamtu tualṭo party-te'n loh theih lohin BJP an thlàwp a ngai nia sawiin, "Mipui bum nan BJP kan thawhpui lo ti ṭhin mahse NEDA hmanga an thawhho thu leh MNF President ngei pawh BJP ho kara a thlalak kan hmu fo," a ti. ZPM chu enchhin an nih tawh thu sawiin, "Hming thar vanga ṭha thut thei an ni lo. Sorkarna siam ta se, BJP an thawhpui ngei tur thute kan hria a ni," a ti.

MPCC Senior Vice President chuan, Congress party an sorkar a nih chuan MNF sor­karin thil ṭha a tihte an chhunzawm dawn thu a sawi bawk.