Telangana aṭangin mi 474 rawn haw

Covid-19 hripui léng leh inkhàrkhip vanga Telangana state (Hyderabad leh a chhehvel)-a Mizo tangkhang mi 474 chuan nimin zing dar 8:40 khan rél hmangin Bairabi chawlhhmun an rawn thleng. An hriselna dinhmun enfiah a nih hnuah an district ṭheuha quarantine centre panpui nghal an ni.

Tangkhang rawn hawte hi Kolasib DC Dr H Lalthlang­liana, SP Vanlalfaka Ralte leh sorkar official dangte'n Bai­ra­bi rél chawlhhmunah an  lo dawngsawng a, thermal ther­mometre hmangin an khawsik leh khawsik lo endik vek a ni. 

Telangana-a Covid-19 hluar deuhna hmuna awmte chu rapid antibody test hmanga endik an ni a, Covid-19 kai rinhlelhawm an awm lo.

Hyderabad aṭanga rawn hawte hi Aizawl district mi 216, Lunglei district mi 30, Siaha district mi 35, Champhai district mi 41, Kolasib district mi 40, Serchhip district mi 29, Lawngtlai district mi 23, Mamit district mi 22, Saitual district mi 12, Khaw­zawl district mi 25 leh Hnah­thial district mi pahnih an ni.