Zawh tawk aia ritin a zawh vangin Tlawng lei a chim- Inquiry Report
Aizawl district magistrate Dr Franklin Laltinkhuma chuan December 2, 2015 zan dar 10 vela Sihhmui leh Lengpui inkara Tlawng lei chim lei chim chhan ber chu a zawh tawk aia rit truck-in an zawh ṭhin vang a nih thu a tarlang.
Aizawl DC hian NH-44A-a Tlawng lei (bailey bridge) chim chhan a chhuina report chu February 6, 2016 khan PWD joint secretary R Laldawngliana hnenah a hlan a; report hlan hma hian a pisaah press mite hmaah inquiry report tlangpui a hrilhfiah.
Mizoram sorkar sorkarin December 8, 2015-a lei chim chhan chhuina tur thupek a chhuahah chuan chhui tur (term of reference) pali a tarlang a; mi pakhatin nunna a chàn phahna lei chim chhan te, lei chim chhan chu dâwngdahna vang a nih leh nih loh leh mawhphurtu an awm leh awm loh te, lei a chim tawh loh nana rawtna siamte a ni.
Dr Franklin Laltinkhuma chuan, lei chu ton 15.5 aia rit zawh phal a ni lo chungin, lei zawh chimtu truck-in a phurh rih zawng chu ton 37.398 vel a nih thu a sawi. Aizawl DC chuan, truck phurh rih zawng chu PWD engineer-te chhût dan a nih thu a sawi a ni.
Truck-in rawra a phurh zat leh a rih zawngah hian truck dri-ver emaw, rawra phurh lâk-na quarry neitute emaw thu zawh-fiah an ni lo a; zawhfiah ve loh chhan chu PWD engineer-te sawi a rin-tlak tawka an ngaih thu a sawi.
Aizawl DC chuan, lei tawpna ve veah truck rit phur zawh phal chin tarlan a nih thu te, lei chu zawh phal chin aia ritin vawi eng emaw zat an zawh a rinawm thu leh chu chu lei chim chhante zinga mi a nih thute a tarlang.
Chutih laiin, Vanglaini leh The Aizawl Post chan-chinbute'n February 25, 2015-a lei hman ṭan leh a nih aṭanga December 2, 2015-a a chim inkarah phal chin aia rit motor-in an zawh thu an chhuah loh thute a sawi.
Lei chu November 14, 2014-a a chim hnuah hmun hrang hranga hmanraw hlui hmangin siam leh a nih thu te, hmanraw thar lei nan Rs. 11,46,363 chiah hman a nih thute a tarlang a; "Lei hman leh a nih hnuah PWD-in weekly inspection neiin, report an pe ziah a, leiah dik lo leh part bo hmuh a ni lo," a ti.
Magisterial Inquiry chuan lei a chim tawh loh nan rawtna a siam a; chutah chuan, lei tawpna ve ve-ah vengtu dah te, lei zawhtu zinga tam tak chu Lengpui Airport hmangtu leh lei bul hnai deuha huan nei, mi khawsa thei zawkte an nih avangin lei zawh man (toll fee) lakte a tel a ni.
Magisterial Inquiry hian NH-44A-a bailey bridge thlanga RCC lei dawh hna thawh tawh, tun thlenga la dawh zawh theih loh chungchang pawh a chhui tel a, report pawh PWD Joint Secretary hnenah a pe nghal. RCC lei dawh mek bik hi chu NIT, Silchar-a mithiamte'n an zir chiang a, report chu a hranpain ziah a ni.
Inquiry Report Tlangkawmna
1. Lei hi a khât tâwka endik reng a ni a, hmanrua bo hmuh a ni lo. Bailey bridge reng reng sei zawng (maximum length) chu ft. 200 a ni a, Tlawng lei hi meximum length a ni. Lei chim chhan ber chu a zawh tawk aia ritin an zawh fo vang a ni tih a chiang.
2. Engineer-te thu zawhfiahna aṭangin, PWD-te dâwngdahna leh ngaihthahna (negligence) thil a awm lo. Anmahni hriat theih si lo truck driver-te'n a zawh tawk aia rit phura an zawh fo vang a ni. Mipuiin chhia leh ṭha hriatna (civic sense) an hmang tâwk lo a, truck rit tak takin zawh ṭhin mah se, PWD leh Police-ah hriattir a ni ngai lo.
3. PWD-in thawktu (manpower) an nei tam tawk lo a, englai pawha lei vengtu tur an dah thei lo. Chutih rualin, lei hi ven a ngai a ni.
Inquiry Report Rawtna
1. Lei hmangtu zinga tam tak chu mi hausa, Lengpui Airport-a kal tur leh Aizawl aṭanga Lengte leh Lengpui vela huan leh thlám neite an ni a, chu'ng mite aṭang chuan lei zawh man (toll fee) lak ni se.
2. Toll fee hi kal lamah chauh lak ni se (ni khat thil thu bikah)
3. Toll fee lâk lohna tura rawtte
i) Maxicab, taxi, bus (load limit aia zâng) leh public transport vehicle dangte.
ii) Mamit district-a registration nei lirthei zawng zawng
iii) Lengpui khaw mite
iv) Lengpui Airport-a thawkte
v) Damlo leh mitthi phur lirtheite
vi) Truck, phurh phal chin phurte
vii) Two wheeler leh three wheeler Rs. 1,50,000 man aia hniamte
4. Toll tax-te chu bank account pakhatah chhûn luh ni se. Mizorama bailey bridge hrang hrang enkawl nan hman ni se. Sum lutte chu kum tin audit ni se, Home Minister kaihhruaiin Coordination Committee on Traffic Management, Aizawl-in enkawl se.
5. Lei tawpna ve veah uniform ha security guard-in veng se.
Toll rate tura rawtna
# Class of Vehicles Toll Rate
1. Executive class (Scorpio, Honda City, Rs. 50
Opel Astra/Corsa, Baleno, Safari,
Duster, Innova, Xylo, XUV500, etc.)
2. First class (Getz, Swift, Rs. 40
Esteem, Bolero, Sumo, etc.)
3. Second class (Gypsy, WagonR, Rs. 30
Santro, Indica, Alto, etc.)
4. Third class (Matiz, Maruti 800 & Van. etc.) Rs. 20
5. 2 wheeler Rs. 1,50,000 aia to (showroom price) Rs. 20