Central YMA-in SRS Din chhunzawm zel dawn

YMA Central Executive Committee-te Inrinnia CYMA Committee Room-a ṭhukhawm chuan, Supply Reduction Service (SRS) kalpui zel an rel.

YMA CEC meeting chuan, ruihhlo do tura din SRS chu a hnathawh hun chhung atana an ruahmansak chu tawp tawh mah se, chak zawk leh na zawka ruihhlo do a nih theih nan chhunzawm zel ni se, an ti. Mizoramah ruihhlo a tam em avangin thâ thlah loa do a ṭul thu meeting-ah tarlan a ni.

CEC ṭhukhawm chuan, tun hnaia MTP leh YLA hruaitute nena Lawngtlaia ṭhu khawm a, thawhhona tha tak nei tura thu an thlung thei chu lawmawm an tih thu an sawi a, "Mizoram hnam tan thil pawimawh tak a nih avangin ram leh hnam tana thawhhona tur thil hrang hrang ruahmante tihlawhtling turin theihtawp chhuah ni se," an ti.

Central YMA chuan, March thlaa Chapchar Kût lawm turah YMA branch hrang hrangte chu an awmna hmun
ṭheuha kût lawmnaa tel turin an ngen a ni.

Election Commission of India-in Central YMA hnena award a hlan chu lawmawm an tih thu an sawi a, "YMA-in national award a dawn theih chhan hi member zawng zawngte thawh rah a nih avangin a lawmawm dan a danglam hle a ni," an ti.