KHAWTHLIR

Award dawng

Community Based Rehabilitation Forum, Bangalore chuan pianphunga rualbanlo mi hlawhtlingte hnena an pek ṭhin Samarthya Award chu Samuel Vankhawngaihdawnga s/o C Vanngurliana, Durtlang hnenah an hlan. Samuela hi kut leh ke zeng chunga lemziak ṭhin a ni a, a lemziahte chu internet kaltlangin a hralh chhuak ṭhin. Award hi Inrinni khan St. Joseph College, Bangalore-ah hlan a ni.

Thisen pe

Central KṬP Blood Donation Calendar angin Inrinni khan Bungkawn bial leh Model Veng branch-te'n thisen an pe. Bungkawn bial KṬP member mipa 43 leh hmeichhia pathumin Aizawl Civil Hospital tan unit 46 an pe a; Model Veng Branch KṬP member mipa 38 leh hmeichhia pakhatin Synod Hospital tan unit 39 an pe a ni.

Catholic hmeichhe Inkhawmpui

Diocese Catholic Hmeichhe Pawl inkhawmpui, Kolasib-a neih chu nizan khan a ṭiak. Inkhawmpui hi Aizawl bishop Most Rev. Stephen Rotluanga'n a hmanpui a, nimin chawhnu khan Eucharist kawngzawh an nei. Nakkum inkhawmpui chu Chhingchhipin an thleng dawn a ni.

Thlanmual in

Bethlehem Veng thlanmual in, AMC sum hmanga sak thar chu Inrinni zing khan bialtu councillor C Lalsawivunga'n a hawng. In sak nan hian AMC sum Rs. 4,70,000 hman a ni.

Khapna thupek

Champhai SDO (Sadar) chuan thupek chhuahin, Champhai sub-division huam chhungah bomb, dynamo leh túr hmanga sangha man a khap. Thupek hian thla hnih chhung a huam a, a zâwm lote chu dan anga hrem an nih tur thu a puang a ni.

ADC-te tel

Hmarchhak biala state hrang hranga ram danpui 6th Schedule hnuaia autonomous district council leh 5th Schedule hnuaia district council-te dinhmun zirchianna, TATA Institute of Social Science-in tun hnaia Guwahati-a a buatsaihah Mizoram-a autonomous district council pathum aiawhte pawh an tel.