Tlawng lei (RCC) ban siam that a ngai
Magisterial Inquiry report chuan, NH-44A, Sihhmui-Lengpui inkar Tlawng lui chunga RCC lei dawh hna ṭan tawh, a ban (bridge pier) phun tawh chu a awm pangngai chuan a che (vibrate) lo a, nawrtu leh nêktu a awm erawh chuan a chê/nghîng thei a, siam ṭhat a ngai tih a tarlang.
Mizoram sorkar chuan Aizawl DC Dr Franklin Laltinkhuma chu Tlawng lei (bailey bridge) chim chhan a chhui rualin, a bula lei thar (RCC) dawh ṭan tawha harsatna awm chungchang chhui tel turin a ti a; a chhuina report chu Bawrhsap chuan February 6, 2016 khan PWD joint secretary R Laldawngliana hnena a hlan a ni. Inquiry report chuan, "Lei bulṭhut (foundation) hi tun dinhmunah a him lo a, siam ṭhat (retrofitting) a ngai," a ti.
Inquiry terms of reference-ah chuan, lui kam tawn tawna lei ban (concrete pillar) phun tawh a ngheh loh chhan te, tun thlenga lei dawh zawh a la nih loh chhan te, sum hman tawh zatte chhui tura tih a ni. PWD Highway Division-a hotute thu zawhfiah an nih bakah, lei ban phun tawh, Sihhmui lam lui kama mi a ngheh loh chhan chu NIT, Silchar leh NIT Mizorama mithiamte zir chiantir an ni.
NIT, Mizoram-in ban a chak tâwk leh tawk loh chu December 18, 2015-ah endikin, January 27, 2016 khan report an thehlut a, a ban chu chak tâwkah an ngai. Sihhmui lam lui kama ban dinna ngheh tawkleh tawk loh erawh chu NIT, Silchar-in January 28, 2016-ah endikin, February 5, 2016-ah report an thehlut a ni.
Inquiry report tarlan danin, RCC lei dawh hna chu July 17, 2009-ah Tantia Construction thawh turin pek a ni a, a hun laia lei dawhna tur senso atana dah chu Rs. 69,951,553 niin, thla 24 chhung (August 1, 2011)-a zo tura tih a ni. Chhan hrang hrang avangin tun thlengin dawh zawh a la ni lo.
Lei ban ngheh loh chhan ber chu, a phunna lei hnuaiah tuiin kua a hreuh (riverine erosion) vang a ni a, ban phunna lei hnuaiah pûk a insiam tawh a ni a; chuvang chuan hna thawh chu June 29, 2012-ah chawlhsan a ni.
Ban phunna hnuaia pûk insiam leh ban ngheh leh ngheh lohte chu Mizoram PWD, contractor leh Ministry of Road Transport and Highways (MoRTH) hotute'n an endik fo tawh. Tantia Constructions chuan Phiske & Associates, Mumbai endiktirin, anni'n March 18, 2013-ah report an thehlut tawh a; MoRTH duh danin, Jadavpur University, Kolkata-a mithiamte endiktir a ni bawk a, August 26, 2013-ah report an thehlut.
Tunah hian consultant rawih ṭhat leh tur a ni a, consultant rawihna tur tender vawi ruk chhuah a nih hnuah chhangtu pakhat chhannaa technical bid chu December 16, 2015-ah pawm niin, financial bid erawh chu tihfel a la ni lo.
NIT, Silchar chuan, ban phunna lei hnuaia lui tuiin pûk a siam avangin, a awm pangngaiin che (vibrate) lo mah se, nêkna/nawrna a awm chuan a che thei tih an hmu chhuak a, "A foundation hi a him tawk lo a, a rang thei ang bera siam ṭhat a ngai," an ti.
Lei dawhtute hnenna sum pek tawh
Instalment Pek zat Pek ni
Mobilization advance Rs. 69,95,100 3.08.2009
Machinery advance Rs. 61,95,691 30.10.2010
Secure advance Rs. 34,97,500 22.03.2010
Running account (RA-I) Rs. 30,16,624 16.07.2010
Running account (RA-II) Rs. 23,03,110 18.03.2011
Running account (RA-III) Rs. 51,19,764 22.03.2011
Running account (RA-IV) Rs. 86,62,361 15.03.2012
Total Rs. 3,57,90,150