Lêng-in serthlum cheng nuai 37 chuang man hralh

Serchhip district-a Hrangturzo bial chhunga awm, Lêng khua chuan nikum khan serthlum an thar ṭha hle a, Rs. 37,78,000 man an hralh.

Leng hi in 165 awmna khua a ni a, chhungkaw tam takte eizawnna chu ser-thlum huan siam a ni. Leng Orange Growers Association-in an chhin-chhiah danin, kum 2015 khan serthlum cheng nuai 37 chuang man an hralh a, an member ni lo chhungkaw eng emaw zat an awm bawk avangin an khaw mite'n serthlum aṭanga sum an hmuh zawng zawng chu an hriat chin aia tam turah an ngai. Serthlum hi an la hralh zo lo deuh bawk.

Leng Orange Growers Association adviser Lalengzauva chuan, serthlum an hralh ṭhat avangin an ṭhalaite'n hnathawh an phûr phah hle tih Vang-laini palai a hrilh.

Lalengzauva sawi dan-in, kum 1986-ah chhungkaw pahnihin serthlum huan an siam
ṭan a, serthlum chu kum 1994 vel aṭangin an hralh ṭan a ni. Serthlum an hralh ṭhat avangin kum 1988 aṭangin chhungkaw pathumin huan an siam ve leh a, kum 2000-ah chuan chhungkaw eng emaw zatin an siam tawh a ni.

Kum 2015-a serthlum hralh zat an chhin-chhiahte chu Rs. 50,000 man hralh chin an ni tlangpui a, chhungkaw 10 vel chuan Rs. 1,00,000 aia tam an lei a ni. Hralh tam ber Lalengzauva te chhungkua chuan Rs. 6,00,000 man an hralh a, "Kum dangah chuan Rs. 7,00,000 - 9,00,000 mante kan hralh a, chhung-kaw tam tak chu Rs. 2,00,000 - 5,00,000 hralhte an ni hlawm," a ti.

Lalengzauva chuan, kum 2014-ah phei chuan an khuaa serthlum ching-tute sum lei chhuah zat chu nuai 50 chuang a nih thu a sawi a; ser-thlum awm lo se chuan an khua chu tun aiin an rethei zawka a rin thu sawiin, serthlum an hralh ṭhat avangin an khuaa chhung-kaw hrang hrangte in chhung bungrua pawh a ṭhat phah tih a sawi.

Association-ah hian chhungkua 86 an tel a; an serthlumte chu vai hoin an lei nasa ber a, Aizawl, Lunglei, Mual-
ṭhuam, Seling, Aibawk leh hmun dangahte an hralh ve bawk.

Leng khuaah hian
ṭhalai ṭhenkhat chu Horticulture department-ah an inziak lut a, serthlum chi siam mi pali an awm mek. Serthlum chi siamtute hian Leng khua leh a chhehvelah an pe kual ṭhin a, NLUP hnuaiah pawh an supply ṭhin.

Serthlum hi May thla tawp lam aṭanga June thla tìr thleng huanah an phun a, December thla aṭanga January thla thleng an kui ṭiak ṭhin. An phun aṭanga kum ruk velah a rah ṭan a, a rah ei tlin tak tak hun chu kum 10 hnu velah a ni thung.