MIFCO Chairman-in sapthei herna tlawh

MIFCO chairman PC Zoram Sang-liana, MLA chuan Inrinni khan Chhing-chhipa MIFCO sapthei herna hmun a tlawh a, loneitute nen an inkâwm nghal.

PC Zoram Sangliana chuan, sapthei chìn chu eizawnna ṭha tak nia a hriat thu sawiin, "Ram dang aṭanga leina tur man zat rawn bituk tawh lo a, a thar chhuaktute ngeiin an duh zat an chhiar ngam theih nan tun aia nasa zawka ṭan lak a ngai. Loneitute'n an thar chhuah aṭanga hlâwkna an sên hi kan duh ber a ni," a ti.

MIFCO general manager Zosangliana sawi danin, sapthei chìnna huan zawng zawng chu MIFCO official leh VLNC/ VCP-te'n an endik vek ṭhin a, ṭanpuina pawh an endikna report ang zela sem a ni.

MIFCO deputy manager (Tech) Lucy Zirsangzeli tarlan danin, Tuikum constituency chhung aṭangin sapthei chíng tur khaw 11 thlan chhuah a ni a, NLUP-RKVY Convergence Scheme hnuaiah MIFCO chu Project Implementing Agency (PIA) a ni. RKVY leh NLUP ṭangkawp hnuaiah mi 500 awmin, NLUP hnuaiah mi 112 an awm.

Kumina captive farming hnuaia loneitute aṭanga sapthei lei tawh zat chu quintal 428.74 a ni a, Suangpuilawn aṭangin qtl. 1448.37 an lei tawh. Kumin chhung hian sapthei litre 38,207 an her chhuak tawh a, litre 35,375 dahṭhat mek a ni.