Sum hmuh a tlâkhniam vangin inrenchemna kalpui a ni dawn
Covid-19 leh inkhàrkhip vanga inrenchem dan tur ngaihtuahtu, Committee on Economy Measures chuan sorkar laipui aṭanga sum hmuh a tlakhniam avangin inrenchemna nasa tak kalpui a nih loh chuan thla hnih/thum hnuah overdraft an hlau.
Committee on Economy Measures tarlan danin, April 2020-ah Post Devolution Revenue Deficit Grant (PDRDG) aṭangin cheng vbc. 118.50 hmuh a ni a, kum 2019-20 khan PDRDG aṭangin thla tin cheng vbc. 226.33 hmuh ṭhin a ni. Share of Taxes aṭangin April 2020-ah cheng vbc. 283.2 hmuh beisei a nih laiin, cheng vbc. 232.96 chiah hmuh a ni.
Committee hian inrenchemna atan rawtna hrang hrang a nei a; rawtnate chu May 22, 2020 khan Council of Minister-in a ngaihtuah a, ṭhenkhat pawmin, pawm lohte pawh a awm a, ngaihtuah ṭhat atana dahte a awm bawk.
Hetih lai hian, sorkar hnathawk hlawh, pension hlawh, pension-te hamṭhatna, sorkar hnathawk nghet lote hlawhah thla tin cheng vbc. 420 vel sên a ngai a ni.
Inrenchemna tur Ṭhenkhatte
Inkhàrkhip vanga department-te'n activity an ngaih loh avangin first quarter atan office expense budget estimate aṭangin 25% tihhniam a ni.
Inkhàrkhip avanga zin veivah a awm mumal loh avangin domestic travel expenses chu 35%-ah tihhniam a ni. Hei hian Police, Health department leh DC office-te a huam lo.
Minor work 25% leh major work 15%-a tihhniam.
Mizoram sorkar sum hmanga India ram páwna zin khap.
Sorkar lirthei tana thla khata POL litre 60 pek theih chu litre 50-ah tihhniam.
Telephone, internet leh mobile phone bill sorkarin a tumsak theih chin 25%-a tihhniam.
State sorkar sum hmanga lirthei lei tihtawp.
A ṭul tàwpah lo chuan sorkar hnathawk post siam belh loh.
A ṭul tàwp tih loh chu MPSC leh MSSSB-te'n direct recruitment an tih tur chu tihtawp rih.
Muster roll leh contract employee-te dah ngheh rih loh.