MPF-in house to house campaign ti lo turin political party tin an ngen

Mizoram People Forum (MPF) chuan, inthlan puan a nih tawh avangin MPF leh Mizorama political party tinte thawhhona thuthlung angin in tina luta (house to house) campaign a remchan tawh loh thu an tarlang a; house to house campaign ti tawh lo turin political party-te leh candidate-te an chah.

MPF chuan October 14, Inrinni khan thuchhuah siamin, Election Commission of India-in Mizoram Legislative Assembly inthlan a puan tâk avangin MPF leh political party-te'n inthlan chungchanga thawhhona thuthlung an lo siam tawhah 'House to house campaign phal loh thu chu inthlan puan hun aṭangin hman ṭan a ni ang' tih a nih thu an tarlang.

Thawhhona thuthlung angin inthlan puan ní, October 9, 2023 aṭangin Mizoramah house to house campaign tih a remchan tawh loh thu tarlangin MPF chuan, "Hei hi inthlanna thianghlim leh zalên a awm theihna tura tih a nih avangin political party tinte'n kan thuthlung a nih ang ngeia zàwm hrâm hrâm turin kan inngen a ni," an ti.

MPF chuan, MPF forum hrang hrang - district forum, constituency forum leh local forum-te pawh an huam chhung ṭheuhah theihtawpa ṭan lo la tur leh Thawhhona Thuthlung ṭha taka zawm a nih theih nan ṭan la turin an ngen bawk.

Thawhhona Thutlung 2(2)-ah inthlan sênso chungchang tarlan a ni a; 'House to house campaign hi candidate-te tan leh MPF tan pawh a hautak em em a. Dan phal baka sum hman sual theihna remchang tak a ni thei bawk. Chuvangin, house to house campaign hi neih loh ni se, candidate-te'n hun leh hmun inang tlangah thu an sawi theih nan common platform siam a ni ang," tih a ni.