Vote chhiar hun tihdanglam chungchangah thu thar a awm lo

Mizoram Election depart­ment hotute chuan, November 7, 2023-a Mizoram MLA inthlana vote tlate chhiar hun tura ruat tihdanglam a nih dawn leh dawn loah Election Commission of India (ECI) aṭangin thu dawn an la nei lo.

Vanglaini palai zawhna chhangin addi­tional chief electoral officer H Lianzela chuan, vote chhiar hun tihdanglam chung­changah ECI aṭangin thu dawn an la neih loh thu a sawi a, "Thu dawn kan neih loh avangin keini lam chu December 3, 2023-a vote chhiar turin kan inbuatsaih. A hun an rawn thlak dawn em kan hre bik lo," a ti.

H Lianzela sawi danin, MLA inthlana vote tlate chu district khawpui ṭheuhah an district chhung constituency-a vote tlate chhiar a ni dawn a; vote chhiarna hmun tur chu district-a Election hotute'n an thlang a ni.

Tarlan tawh angin, ECI-in Mizoram MLA inthlana vote tlate chhiar hun tura a ruat December 3, 2023 chu Pathianni a nih avangin a hun sawn turin Mizoram Kohhran Hruaitute Committee, tlawmngai pawlte leh political party hrang hrangte'n ECI hnenah ziakin an ngen a ni.