Rahul Gandhi vawiinah a rawn zin dawn; MPF Thuthlungin kawngzawh a phal lo

Congress party hruaitu pawimawh Rahul Gandhi chu Mizoram inthlanpui atana campaign turin vawiin hian Mizoramah a rawn zin dawn. A hoin vawiin hian Aizawlah kawngzawh tum ni mah se, MPF ngenna angin kawngzawh lian tham an huaihawt dawn lo nia thu dawn a ni.

Ruahman dan chuan, Rahul Gandhi hian vawiinah Aizawl a rawn thleng ang a, vawiinah vêk Chanmari kâwn aṭanga Raj Bhavan gate bul thleng kein kawngzawh huaihawt an tum a ni a; MPCC hruaitute chuan kawngzawh hi kaltlangpui tum a nih thu Vanglaini palai an hrilh.

Hetih lai hian, Mizoram People Forum leh political party-te Thawhhona Thuthlung 3(3)-ah chuan, 'Inthlan puan hnuah kawngzawh hi tih loh tur a ni,' tih a ni a; Thuthlung 2(7)-ah 'Central/State dang aṭanga party hruaitute campaign-a an lo kal pawhin flag leh banner-te hi meeting neihna hmun bakah tàr loh tur a ni' tih a awm bawk.

MPF hruaitute'n Congress party chu kawngzawh huaihawt lo turin an ngen. Vanglaini zawhna chhangin MPF general secretary Rev. Lalramliana Pachuau chuan, "Inrinni (October 14) tlai khan Congress party hruaitute kan bia a, kawngzawh hi MPF leh party-te thawhhona thuthlungah tih loh tur tih a nih avangin min zahsak rawh u, min zahsak loh chuan a buaithlak vek ang, kan ti a, anni pawhin kawngzawha rik luih luih ang chu tih an tum loh thu an sawi," a ti.

Congress party hruaitute'n MPF General Secretary an hrilh danin, kawngzawh tak tak ang chu an ti dawn lo a, Chanmari-ah Rahul Gandhi an lo hmuak ang a, kea Raj Bhavan gate a pannaah Congress hruaitu mi tlemtêin an zui ang. Kawng dungah erawh chuan miin an chibai theih nan ruahmanna siam a ni bawk.

MPCC chuan MPF hnenah lehkha thawnin, Raj Bhavan hmar lam gate bulah Rahul Gandhi puala vantlang inkhawm buatsaih an tum chu MPF-in kaihruai se an duh thu an thlen a ni.

Rahul Gandhi hian naktukah lehlángin Lunglei a tlawh dawn a, naktukah vek Aizawlah lêt lehin, October 18, Nilaini-ah press conference a nei ang a, press conference zawhah Mizoram a chhuahsan ang.